Kut nei lo zirlai pakhat ke hmangin a exam

ZORAM TODAY | March 1-14, 2016 –Hriatpuia Khiangte

‘Tum chuan kawng a awm’ tih chu kum 19-a upa Sahil Shaikh nun atangin a chiang kher mai. A kut pahnih a hloh hnuah pawh chartered accountant nih a tumna chu a nêp thei chuang lo! He HSC zirlai hian ke hmangin exam a chhang!

State Board dânin exam hun pangngai bak chu a tan an phalsak a ni tih a hriat hnuah Shaikh chuan exam a tum ruh bur a, a ke hmanga ziak thei turin a inzir ta char char a, a duhthusam ang ngeiin Class X (SSC) Board exam chu a ke hmangin a exam thei ta a ni.

Sheikh hian a kut electric man vangin tan a ni a, ni tam tak na tuarin a awm. Kum hnih chhung ngawt chu rilru mumal pawh pu thei lovin a awm a, sikul pawh a kal thei lo. Chumi hnuah, Kiran Bora hnenah Board exam hmachhawn turin coaching class a kal leh thei ta chauh niin a pu Aziz-a chuan a sawi. “Ka chhungte leh thiante’n min fuih nasa hle. Nitin ka ke ka sawizawi a, exam hma chu nitin darkar khat tal chu ke hmanga thil ziah ka zir thin,” tiin Sheikh chuan a sawi.