Kum 68 chhung a thlâwnin damlote tan

ZORAM TODAY | March 1-14, 2016 –Hriatpuia Khiangte

Bank account aia patient dah pawimawh zawktu, kum 91-a upa Dr. Bhakti Yadav chuan a mamawh apiangte tan inchhit ral a thlang zawk.

India ram khawpui lar berte zinga chhiar tel – Indore atanga MBBS hmasa ber Dr. Bhakti inpekna hian hriat a hlawh hle a; kum 1948 atang khan a thlâwnin damlo sang chuang zet a enkawl tawh a. Kum upat vanga a taksa a chak loh hnu-ah pawh mi dangte tan a inpekna a dah tha mai lo a, a hriatna mamawhtute’n an chhawr theih dan kawng a dap hram zawk thin.

Gynaecologist an tih mai, hmeichhe lam natna bik enkawl thiam Dr. Bhakti Yadav chanchin sawi hi national media lam chaw tui ber a ni chho a, Zee News pawhin a pual hian documentary clip a buatsaih hial a. State pawn atang pawhin a enkawl nih thlang mi tam takin an pan hial thin.

Dr Bhakti hian raipuar sang chuang zet nau a chharsak tawh a, a tanpuina mamawh vanga zan laia an kawngka kiktute’n an kik thlâwn ngai lo.