Kum 107 mi dam reina thurûk – Zu!

ZORAM TODAY | March 1-14, 2016 –Hriatpuia Khiangte
Awmze neia zu khuahkhirh ‘tumna’ dân MLPC Act pian hma daih atanga zu no dawm tawh – Spanish putar Antonio Docamp chu tun hnai khan a thi a, kum 100 chuang zet a dam chhanah mi tam tak chuan zu an puh.


Kum 107 zet a dam thlen hnua fam ta Pu Antonio kha Spain-a Vigo-ah a khawsa a. A hriat theih chin ata a ka chhungah tuisik far khat pawh a la lût lo a, zu erawh a buakin a baw lût hawk hawk thung – a sawi danin. Zu um leh a kut a inchâr tlat emaw tih mai turin Pu Antonio khan zu a heh a, a zu in zât teh na’n pawh ‘no’ ni loin ‘litre’ ngat a hmang!

“Ni khatah litre 4 vel ka in tlangpui a, keima siamchawp ngat ka in ber nghe nghe,” tiin chanchinthain kan ram min luhchilh hnu lawka piang Pu Antonio chuan a dam laiin sawi. A zu in zât tim miah lova sawitu Pu Antonio kha insawi thei satliah a ang lo va, a chhungte pawhin zu nen an inlaichinna thatzia an hriatpui thlap!

“A tlangpuiin, kum tin zu litre 60,000 vel a siam thin a, litre 3000 chu a in atan a serh hran laiin a dang chu a tul dan azirin a hralh chhuak thin,” tiin a chhungte chuan an sawi. Pu Anonio kutchhuak zu hi chemical leh organic lam tel lohna a ni tlangpui a. Taksa hriselna khawih pawi theitu a pawlh loh vanga dam rei phah taah mi tam tak chuan an ngai.

Mahse, taksa tan zu a that leh that loh thu-a ZT ngaihdan chu ‘Read the bottle and Risk your life’ tih hi a ni!