Court-in dam chhung táng turin kum 4 mi a hrem!

ZORAM TODAY | March 1-14, 2016 –Hriatpuia Khiangte
Egypt-a rorelna in (Court) pakhat chuan kum 4-a upa mipa naupang chu jail-a a dam chhung hun hmang turin a chungthu a relsak hman a, a hnu lawka tihsual palh a ni tih hriat chhuah a nih hnuah he thurel rum tak hi sût lehnghal a ni.


Pawikhawihna lian tham chi hrang hranga inhnamhnawiha puhte zingah Ahmed Mansour Karni (4) hi a tel ve ran a. Thubuai lian tak tling thei tur heng case rit tak takah te hian kum 2 a tlin hma khan a lo inhnamhnawih niin an puh.

Tun kar khan Cairo court-in naupang kum 4 mi Karni leh mi dang 115-te chungthu a ngaihtuah a, anni hi kum 2014 kum tir lama Fayoum province huam chhunga pawikhawihna pian tham tak thlengah inhnamhnawia puh an ni. An vai hian an in lama let leh tawh lo tura jail pan turin court chuan an chungthu a rel.

Kum 2012, September thlaa piang Karni chunga court thutlukna hi a hria apiangin an dodâl nasa hle a, social media lamah pawh mi tam tak a tithinur.

He mi hnu hian Interior Ministry thupuangtu Abu Bakr Abdel Karim chuan, court hremna chu Karni chunga tla a nih loh thu sawiin, “Dam chhung táng tura hrem hi amah ni lovin a patea zawk a ni,” a ti a, tihpalh thil thu liau liaua a hming chuang ve a nih thu a sawi.