Thla 6 chhungin health worker-in tum 85 nau pai

ZORAM TODAY | November 17-30, 2015 – Hriatpuia Khiangte
Sawrkar thau sâwk thla zawnga khawsak hreh lo ve tak, Assam Health Department hnuaia thawk Lili Begum Majumdar chu thla 6 chhungin tum 85 zet raipuar angin a inziak.

Nau paite hnena Assam sawrkarin tangkafai cheng 500-a a tanpui thin chu awtin, he health worker nu hian ruahmanna verther tak a siam a, raipuarte chhinchhiahna bu-ah a hming a lo ziak lût ve mawlh mawlh a, mi thenkhat rinhlelh vanga an chhui chian hnuah meuh chuan thla 6 chhungin tum 85 zet nau a lo pai hman.

Lili Begum thil tih hi han lenpui thúr thúrna tham a ni chiah lo va, thla ruk chhunga sorkar sum a lo paipawn zawng zawng hi cheng 42,500 bawr vel a tling. Mahse, a thil tih sual zât zawk hian thuneitute sahuat a khawih hle niin an sawi.


Hailakandi-a Algapur Public Health Centre (PHC)-a thawk lai Lili Begum Majumdar hi a kih hnawkah a âwk ni mai tawh lovin a chingchivêt nasa hle a, a tâl chhuak leh thei a nih pawhin thla eng emaw zât chu an in leh court a kartawn zak zak a ngaih hmel.