Kum 97 mi hnenah matric certificate hlân

ZORAM TODAY | November 17-30, 2015 – Hriatpuia Khiangte

Kum 100 tlinna tura kum 3 chiah mamawh tawh Margaret Thome Bekema chu High School a zir chhuak tih nemnghehna certificate hmanni lawk khan hlan chauh a ni.

Kum 97-a upa Margaret Thome hian lehkha a zir chhungin kawng bumboh tak a paltlang a, zirnaa a tluan chhoh dawn lai tak, beiseina sáng tak nen a zirlaia a insàwrbing laiin cancer natnain a nu a tlâkbuak. A zirna chawlhsana a nu enkawl a ngaih avangin, a zirlaibu khupin a nu tan a inpe ta zawk a.

Kum 76 zet a vei hnuah Pi Bekema-i’n zirna a chawlhsan chhan chuan School thuneitute beng a thleng a, lungrual takin Margaret Thome kuta high school diploma hlan an remti ta a ni. “Ka lawmzia hi ka sawi fiah thiam lo takzet. Mi narân ve mai tan chuan a hlu lutuk a ni,” tiin pitar inngaitláwm tak chuan a sawi.

A chhungkhat leh thenrual thate hmuh laia October ni 29-a certificate hlan a nih lai khan lâwm avangin Pi Bekema biangah mittui a luang ngiai ngiai a ni.