Chatlak lovin kum 137 chhung ni tin tawngtai

ZORAM TODAY | November 17-30, 2015 – Hriatpuia Khiangte

Khuarèl chhiatna hrang hrang pawhin a dan zawh loh, Wisconsin-a sakhaw rawngbáwltu hmeichhiate chu kum 1878 atanga vawiin thlengin an la tawngtai. Kum 137 chhung zet khaihlak lovin an tawngtai tawh.

La crosse-a Franciscan Sister rualte hi kum 1878, August ni 1 atang khan an tawngtai tan a; a bul tantute’n mual liam tawh mah se, an aiawhte hnenah inhlânchhawng zelin vawiin thlengin an la chhunzawm. Damlohna vanga hun rei tak bawihsàwm ngaite leh natna khirhkhàn tuarte tan an tawngtai thin.

US-a state pakhat Winconsin-a khawpui pakhat La Crosse-a ‘tawngtai-mite’ hian ni tin chhum lo chat loa an tawngtai thin thu an sawi a, an chhût danin, mi 150,000 báwr vel tan an tawngtai tawh.

Chatlak lova tawngtai thin Sister 100-te hian puitu (tawngtai kháwl) an nei veleh a, chung mite ‘prayer partner’ an tih mai te chu an vaiin mi 180 bawr vel an ni thung. Mi dangte tana tawngtai thinte hi an inthlâk kual ve zel.

Khaihlak awm miah lova an tawngtai tan atangin harsatna an hmachhawn tam hle a; a changa tui a len bakah vúr a sùr chang a awm a, tláng hrî a lên chang a awm. Mahse, chung zawng zawng chuan a dangchat thei lo a ni ber.