Exam-naah bawng hruai lut

ZORAM TODAY | October 20-2 November, 2015 Hriatpuia Khiangte
Ran dang zawng aia bawng lar zawkna India rama thingtlang khaw pakhatah, exam beitu pa pakhat chuan exam an hmachawnna pindanah bawng a hruai lut kher a, reilote chhungin ram pum titi a tling nghal der.

Thingtlang khaw pakhat Budgam-a chêng Abdul Rashid Bhat chuan, exam hall-a bawng hruai lut turin dikna a nei tih a sawi a, “Exam fee ka pêksak miau a, exam hall-a a thut ve chu a thiang lo em ni?” tiin hemi chungchang ziaktu national newspaper reporter a hrilh.

Bhat chuan a thil tih chu tute emaw elsènna a ni lo tih sawiin, “Hei hi mi rilru tihnat tumna emaw, tute emaw deusawhna a ni lo. Ka bawng tana exam form ka tihsak nachhan chu kan kalphung enchhin ka duh vang mai a ni,” a ti. Bhat hi Kashmir ram laili-a Budgam district-a thingtláng khaw pakhat Chadoora-ah a khawsa mek.

Online hmanga Jammu and Kashmir Board of Professional Entrance Examination (BOPEE) form tifel tawh tura thuneitute’n ruahmanna thar an siamah thil felhlel a awm ngei tih finfiah a duh thu Bhat chuan a sawi a, mak deuh maiin harsatna awm miah lovin, a bawng tan form a tifel thei tlat a ni.

Bawng admit card hi board thuneitute’n Kachir Gaww (bawng hming)-in an pe chhuak a, Bemina-a Government Degree College-ah he bawng hi seat siamsak a nih miau avangin exam hall-ah a thu ve luau ta a ni!