Zawhte kal thlak nan cheng nuai 20 chuang sêng

ZORAM TODAY | October 6-19 October, 2015Hriatpuia Khiangte
Kal (kidney) that loh avanga dam hlei thei lo zawhte pakhat chu a neitute’n vaw hlum mai lovin a kal an thlâksak zawk a, chéng nuai 20 vel zet an séng.

Ran chunga mi ngilneite sawi ruala an hming sawi fo tawh tur Andre Gonciar leh a nupuite hian zawhte an vulh a, hming pangngai tak vuahsakin ‘Oki’ an ti thlap. Kum 12 zeta upa Oki hian a taksaa harsatna thlentu natna chu chhel taka a tuar hram hram thu Gonciar chuan a sawi a, “Fighter dik tak a ni,” tiin a sawi hial a ni. 

Sênso dang tiam lohvin, Oki kal thlâkna atan ringawta sèn ngai zat chu US dollar 16,000 vel a ni a, India pawisain cheng nuai 10 chuang a ni. Mahse, a behbàwm sênso dang nena belhkhâwmin US dollar 30,000 vel zet a kái chho va, chu chu India pawisa chuan cheng nuai 20 vel zet a ni.

Oki an zaina, kháwl changkang tak nena thuam, changtlung bawk si University of Pennsylvania Veterinary Hospital chuan hetiang operation hi kum 1998 atang khan tum 155 an lo tihlawhtling tawh a, a tlangpuiin, zai tâwk tawh zawhte te dam hun chhung chu kum 3-in a sei phah deuh zel niin an sawi.