Auto khalhna fawng vuan chungin lehkhabu ziak!

ZORAM TODAY | September 15-5 October, 2015 -Hriatpuia Khiangte
Auto a khalh a, a chang chuan tlânna tur hmu lovin a ding thin. A chang leh traffic jam-ah a tâng bawk – chutiang kara hunawl a neih chu lehkhabu ziah nan M. Chandra Kumar chuan a hmang a nih chu!

Coimbatore-a khawsa, kum 51 mi Chandra Kumar hian thawnthubu a ziak a ni satliah lo. Chu a thawnthubu behchhan chuan movie siam a ni a; khawvel huap film phochhuahna kûtpui – Venice Film Festival-ah chu movie chu pholan a ni nghe nghe.

“Ka tan chuan eng nun pawh hi zirlai a ni,” tiin Chandra Kumar chuan a sawi.

Tlangval a nih laiin police-te’n a thiante pahnih nen an man a, Andhra Pradesh-a Guntur District-a tâninah an khung. Chhan leh vang awm lovin police-te chuan ni 13 chhung ngawt kut an thlâk a, chu chuan a tum a tiruh ta zawk a, a kutchhuak hmasa ber tur thawnthubu a ziak a; chutah chuan mi retheite dinhmun chhiatzia leh an him lohzia a ziak.

Tun thlengin Chandra Kumar hian lehkhabu paruk a ziak tawh.

September 2-12 chhunga Venice Film Festival neihah khan a kutchhuak behchhana Tamil movie siam pholan a ni a, he hun chhim tur hian September 8 khan Chennai atangin Venice panin a thlawk nghe nghe.