‘Lol’ luahlantu ‘haha’

ZORAM TODAY | September 1-14, 2015 – Hriatpuia Khiangte
Facebook zirchianna thar berin a tarlan danin, ‘LOL’ tih thumal a chuai mek a, ‘haha’ tih leh smiley chhinchhiahna hrang hrangin a luahlan mek.
Zirchiangtute chuan tun hnaia online-a facebook hmangtute ‘nuih dan’ an belhchian hnu-ah ‘haha’ tih chu thu hman tlanglawn ber a ni tih an hmuchhuak a, hemi dawtah hian ‘smileys’ hrang hrang leh ‘hehe’ tih te a awm. Mizote chauh lo pawh kan nuih dana nui an lo awm tam hle ni tur a ni!
Thil hlimawm leh nuih tiza thei rawngkaiin a den changin facebook hmangtu zinga 51.4% zet chuan‘haha’ tih thumal an hmang thin a, 33.7% chuan smiley chhinchhiahna hrang hrang an hmang ve thung. 13.1% chuan ‘hehe’ tih an hman laiin ‘lol’ tih hmangtu chu 1.9% an tling pha awrh thung.
Mipa leh hmeichhiaa inthliarna (gender) azirin thu hman lar a inang lo niin zirchiangtute chuan an sawi tel bawk. A bikin mipate chu ‘haha’ emaw ‘hehe’ emaw tia an nuih bãwk bãwk laiin, hmeichhia chuan a tlangpuiin ‘emoji’ an hmang mai thin.