Kum 8 mi duhthusam thleng dik!

ZORAM TODAY | August 17-31,  2015 —Hriatpuia Khiangte

Kum 2 mi a nih laia a kut tansak a nih hnuah, kum 8 mi, Zion Harvey duhthusam chu kut pangngai neih leh a ni a, kut nei lova kum 6 chhung hun a hman hnuah a duhthusam chu a thleng dik dawn ta!
A têt laia bacterial infection an tih natnain a tlakbuak avangin Zion Harvey, Baltimore, Maryland ami chuan a kut a chân a, hei bakah a kal (kidney) chu a nu kal hmanga thlak a ni bawk. Heta tang hian a dam chhungin kut leh ke a nei lo hlen dawn emaw a inti a, amah leh a chhungte chuan beiseina an nei tawh lo.
Mahse, kumin July thla tawp lam khan Dr. L. Scott Levi kaihhruai mithiam rual 40 chuan Philadelphia-a Children’s Hospital-ah darkar 11 chhung teh meuh mai Zion Harvey hi an zai a, hlawhtling takin a kut an zawmsak a, an zingah kut lam enkawl thiam bik mi 10 lai an tel. Kut thar an vuahsak hi pangngai takin a hmang thei thuai dawn niin a thlaksaktute chuan an sawi.
July ni 28, 2015-a Children’s Hospital of Philadephia (CHOP)-a chanchinbumite an kawmnaah a zaitu pakhat chuan khawvela kut thlaksak naupang ber a nih thu a sawi nghe nghe.