Facebook vangin nunna humhim!

ZORAM TODAY | August 17-31,  2015

Ram thenkhatah facebook vanga accident tawka nunna chân an awm nawk laiin Chris Thomas, kum 28 mi, Pittsburgh-a mi erawh chuan a nunna chhanhim nan a hmang zawk hlauh mai!
Chris Thomas hi sipai bang niin ke tihchet theih loh avanga wheelchair-a hun hmang a ni. July ni 15, 2015 khan an bualin bawm awm chu a mutna pindana dah luh tumin wheelchair-a thu chungin theihtawp a chhuah a, mahse, a chesual hlauh mai. A bawm ken rit tak mai chuan a ke-ah delhin wheelchair-ah a tukkhum a sawh a, a bawm chu pawh chhuah tuma a tan laiin a insawh nawn leh a, thisen tam tak chhuak nghalin darkar khat zet chu nikhaw hre lovin a awm zui ta a ni.
A harh hnuin tanpuitu a au va, mahse, a awmna hi building-ah pawh a sir berah a nih avangin tumahin an hre thei si lo.  Guard kohna tur emergency alarm awmna a thleng thei tawh bawk si lo, a buai hle a. Vanneihthlak takin a smartphone a lo ak hlauh va, facebook application hawngin “I neet he kl p m==#]Please /fc” ‘ff: ‘ 933,91++” tiin status a update nghal a.
A thu post chu a facebook friend thenkhat, state dang danga awmte chuan an lo ngaihven nghal hle a. Harsatna a tawk a ni tih hriain a thianpa Brad chuan tanpuitu tur a koh thu message a rawn thawn nghal a. Rei lo te hnuah tanpuitu lo thlengin damdawiinah kalpui nghal a ni a, damdawiinah hian zanah riakin a tukah dam takin a chhuak leh a ni.