Darkar 46 chhung birthday hmang!

ZORAM TODAY | August 17-31,  2015 
Sum nei tan chuan ni khat hi rei tak a hman theih tawh a ni ber e. German pa pakhat pawhin darkar 46 chhung zet mai birthday a hmang thei tlat!
Tun hnai mai khan German mi Sven Hagemeier a kum 26 tlin lawmna chu dangdai taka hman a; chumi tur chuan ni hnih chhung chu thlawhtheihna hmanga zin kualin time zone hrang hrang a paltlang a; Auckland, New Zealand atangin Brisbane, Australia-ah a tum a, heta tang hian Honolulu, Hawaii a pan leh a. Tichuan, birthday hmang rei thei ber record a siam ta a ni.
Sven hian kum 1998 June thlaa Pakistan mi Nargis Bhimji record siam a khûm a, ani hian a birthday lawm nan Karachi atanga Singapore panin, chuta tangin San Francisco-a pan leh a, time zone hrang hrang paltlangin darkar 35 leh minute 25 hun a hmang.
Record siamtu Sven chuan, “Guinness World Record siam hi ka naupan têt atanga siam ka tum leh ka châk a ni thin a, ka ngaisang bawk. Record ka siam thei ang em tiin ka inzawt thin a, record siam dan tur ka ngaihtuah chhuah hnuah mahni inrintawkna ka neih phah ta a ni,” tiin a sawi. Sven hian ni hnih chhunga a hun tam zawk chu thlawhtheihna chhungah a hmang a, ei leh inte pawh thlawhtheihnaa mi a ei mai bawk a ni.
Hawaii-ah hian a nupuiin a lo nghak a, zan hun hlimawm tak an hmang a ni. Hemi avanga Guinness World Record-in certificate an hlan chu, “An incredible present!” tiin a sawi hial.