Mysore bihchianna

ZORAM TODAY | March 1-14, 2016

Mysore khawpui hming hi November ni 1, 2014 ‘Mysuru’ tia thlak a ni. Khawpui upa ve tawh tak niin kum zabi 16-na atanga ‘Mahishuru’ hming pua lo ding tawh a ni a, kum 1888 khan Mysore City Municipal dinin khawpui inrelbawlna mumal tak an lo nei tawh a, ward 8-ah then a lo ni diam tawh a ni. Kum 1897 khan hrileng avangin a khaw mipui zatve dawn ngawt an thi. Kum 1903 khan City Improvement Trust Board (CITB) din a ni a, Asia khawmualpuia khawpui inrelna mumal nei hmasa berte zing ami a ni.

Kum 1888-a Mysore City Municipal an din hian khawpui chhung inrelbawlna zawng zawng a khawih vek a, kum 1977-ah corporation-ah leh a ni. Khawpui chhung hnathawh zawng zawng, hriselna lam, thianghlimna lam, tui thianghlim pek leh chhiah pek te a keng tel vek a ni. Corporation hi Mayor-in a ho va, a hnuaiah commissioner eng emaw zat leh council member thahnem tak an awm leh bawk. Tunah hian ward 65-ah then sawm a ni. Khawpui hmasawnna leh zauhna lam hi Commissioner kaihhruai Mysore Urban Development Authority (MUDA) kutah a awm thung. An tui tlan hi khawpui atanga hla lo tê-a luang Kaveri leh Kabini lui atanga an lak a ni.

Kum 2011 census-a a lan danin, Mysore khuaa cheng hi mi 8,87,000 lai an ni a, mipa 1000 zelah hmeichhia 1000 awm ang an ni a, square kilometre khatah mi 6,910.5 awm ang an ni. A khawpui lehkhathiam tam zawng (literacy rate) hi 86.84% niin state literacy rate 75.6% aiin a tam zawk. Mipui tam zawk hian Kannada tawng an hmang.

Mysore hi City of Palace ti hiala an koh a ni. Amba Vilas an tih, Mysore Palace tiha hriat lar te a awm a, art gallery awmna Jaganmohana Palace te; summer palace tia an sawi thin Rajendra Vilas te; tun hnua hotel atana an hman tak Lalitha Mahal te, Jayalakshmi Vilas te a awm. Mysore Palace pui ber hi 1897 khan a tluchhe tawh a, hemi hmunah vek hian din thar leh a ni. Jayalakshmi Vilas Mansion hi Sri Chamaraja Wodeyar-a’n a fanu Jayalakshammanni tana a sak a ni a, tunah hian museum atana hman niin lal ro leh hmasang thil thahnem tak dah a ni. Hengte vang hian he khawpui chhunga an industry lian ber chu tourism a nih theih phah a ni. Kum 2010 chhung khan khualzinmi mi maktaduai 3.15 zetin he khua hi an tlawh nia! Ni 10 awh Dasara festival an hman thin hian khualzinmi a hîp nasa hle.  Chamundeshwari Temple te, St. Philomena’s Church leh Wesley’s Cathedral te hi sakhaw hmun pawimawh a ni a, kum 1892-a hawn Mysore Zoo te, National Park leh sanctuary eng emaw zat awmte hian khualzinmi a hîp nasa hle bawk.

Kum 1911 khan Mysore economic conference an lo nei daih tawh a, hemi hnu kum 1917 khan Mysore Sandalwood Oil Factory din nghal niin 1920-ah Sri Krishnarajendra Mills din a ni leh bawk. Information technology lamah pawh an duai lo hle a, Karnataka-a IT lama an sum lakluh cheng vaibelchhe 1363 (US$275 million) zet chu he khawpui thawh chhuah a ni.

Zirna lamah pawh an sang hle. European zirna kalhmang a rawn luh hmain Brahmin chennaah Vedic education an lo kalpui dim diam tawh a, kum 1833-ah English school an din tawh bawk. Kum 1864-ah Maharaja College din a ni tawh a, kum 1881-ah hmeichhe tan high school an din tan a, chu chu a hnuah Maharani’s Women’s College tia thlak a ni. Kum 1892-ah Industrial School din a ni a, chu chu he khawpuia technical education bultanna a ni. Kum 1913-ah Chamarajendra Technical Institute din a ni zui bawk. Mysore Sanskrit college hi kum 1876-ah din a ni a, Vedic education te pawh an la telh zel bawk. Kum 1916-a University of Mysore an din hian zirna lamah hma a sawntir hle; hei bakah hian zirna in pawimawh tak tak – CFTRI, MYRA School of Business leh Mysore Medical College te a awm.

Mysore hi International Ganjifa Research Centre hmunpui a ni a, hetah hian hmasang card game chi khat Ganjifa leh thil dang zirbing a ni. Chamarajendra Academy of Visual Arts (CAVA)-ah hian lemziak lam te, milim ker lam te, thlalak lam te, graphics leh photojournalism te zirtir thin a ni bawk. Kannada thuziakmi lar Kuvempu te, Gopalakrishna Adiga leh U. R. Ananthamurthy te hi Mysore atanga inzir chhuak an ni a; English tawnga thawnthu ziak thin, Indian novelist R. K. Narayan leh a unaupa cartoonist lar em em mai R. K. Laxman te pawhin an hun tam zawk chu he khawpuiah hian an lo hmang tawh nghe nghe.

Mysore hi Karnataka state chhim lam khawpui ber a ni. Khawpui mawi tak mai a ni a, lal in ropui tak tak bakah dil mawi tak tak — Kukkarahalli te, Karanji leh Lingambudhi dil te a awm. Kum 2001-a zirchianna neih atanga a lan danin, khawpui area pumpuia 39.9% chu chênna inin a luah a, 16.1% chu kawngpui, 13.74% chu intihhlimna park leh hmun awl, 13.48% industry hmun, 8.96% chu vantlang thil, 3.02% chu sumdawnna lam, 2.27% chu agriculture leh 2.02% chu tui awmna a ni. Lui pahnih Kaveri leh Kabini inkarah a awm.

A boruak pawh a nuam tawk hle a, khaw lum ber record chu April ni 4, 1914 daih tawh khan niin 39.4 °C (103 °F) a ni a, a vawh ber pawh January ni 16, 2012-ah niin 7.7 °C (46 °F) a ni. Kum tina ruahtui tla zat hi 804.2 mm (31.7 in) a ni bawk.

Khawpui hi National Highway NH-212-in a tlan tlang a, State Highway 17-in Bangalore thlengin a thlunzawm, hei hi kum 2006 khan four-lane-ah tihlen a ni. State Highways 33 hian HD Kote nen thlunzawmin State Highway 88-in Madikeri nen a thlunzawm bawk. Karnataka State Road Transport Corporation (KSRTC) leh private agency dangte’n bus an service-tir a, auto-rickshaw bakah sakawr tawlailir a service bawk. KSRTC hnuaiah Mysore City Transport Corporation (MCTC) din tura ruahmanna siam mek a ni. Rail station changtlung tak a awm mek a, Kum 1882 khan Bangalore–Mysore rel kawng an lo hawng daih tawh. Kum 2010 khan Mysore Airport hawn that a ni. Kum 1859 atangin newspaper a lo chhuak tan tawh a, India rama private radio broadcast hmasak berna niin kum 1935 September ni 10 khan Psychology Professor MV Gopalaswamy  chuan bul a lo tan tawh. AIR Station atangin FM radio leh Gyan Vani an broadcast a, private FM channel BIG FM leh Red FM a awm. Kum 1980 atangin TV an broadcast tan bawk.