India ram khawpui fai thlannaah Aizawl 41-na

ZORAM TODAY | March 1-14, 2016

India ram puma Urban Development ministry-in zirchianna a neih hnuah Karnataka khawpui pakhat Mysuru chu India rama khawpui fai bera thlan a ni a, Chandigarh-in dawtin Tiruchirapalli-in an dawt leh a, New Delhi Municipal Council (NDMC) chu palina niin Visakhapatnam chu pangana a ni bawk. Khawpui 73 thlan chhuah zingah Mizoram khawpui Aizawl chu 41-na a ni.

Tun tum ranking an siam hi an vawi hnih neihna a ni tawh a. Kum 2014-a a hmasa ber atana zir chianna an lo neih tawhah pawh Mysuru tho hi pakhatna a lo ni tawh a, tun tuma 10-naa awm Greater Mumbai chu 2-na a ni nghe nghe. Tun tumah hian khawpui bal berah Dhanbad thlan niin Asansol, Patna, Meerut, Raipur, Ghaziabad, Jamshedpur, Kalyan Dombivilli leh Itanagar-in an dawt nghe nghe.


Kum 2014 October thla khan Modi chuan India ram khawpui hrang hrangte’n faina lama hma an sawn theih nan Swachh Bharat Mission (SBM) a hawng a, Aizawl khawpuiah pawh nasa takin hma an la tawh a ni.

India ram khawpui Delhi hi Municipal Corporation anga thlan a ni a, VIP tam berte chenna hmun New Delhi Municipal Council (NDMC) hi 4-na ni mah se, East Delhi Municipal Corporation (EDMC) chu 52-na a ni a, North leh South Delhi Municipal Corporation chu 43-na leh 39-naah an awm ve bawk.

Heng khawpuite hi Swachh Bharat Mission hmalakna atanga tehna hrang hrang hmanga teh a ni a, bawlhhlawh tihriralna kawngah te, faina lamah mimal hmasawnna kawngah te, vantlang inthiarna leh faina leh thianghlimna lam thlengin tehfungah hman a ni.

Mysuru hian tehkhawng hrang hrangah point a hmu tha hle a, a pumpuiah point 1749 hmuin a hnaih bertu Chandigarh nen point 33 ngawtin a inthlau a ni. Mimal faina lamah te, vantlang inthiarna, in tina bawlhhlawh lak khawm, khawpui pumpui faina dinhmun, bawlhhlawh sawngbawl leh tihriral dan, mipuiin faina lama an thanharh dan te thlengin an zir a, mi 110 teh meuh mai chuan January ni January 5-20 chhung zawng khan zirchianna an nei a ni.

Heng khawpui 73-a mihring cheng zawng zawng hi vaibelchhe 12.47 ngawt niin chu chu India rama khawpuia cheng hmun thuma thena hmun khat a tling hial.

Tehkhawng lian tak chi hniha teh a ni a, a hmasa zawk chu a chunga kan tarlan zawk niin, tehkhawng pakhatah chu chi thumin an then a. Service level status hian mark 1000 a pu a, physical/independent observation hian mark 500 a pu a, hei hi a hmuna zir chiangtute mark pek a ni. Hei bakah hian faina chungchanga mipuite ngaihdan (citizen’s feedback)-in mark 500 a pu bawk.

Service Level Status-ah hian Open Defecation Free town (ODF) leh Integrated Solid Waste Management (ISWM) an kalpui dan te; Information, Education and Behaviour Change Communication (IEBC) lama an hmalakna te; bawlhhlawh sawngbawl leh tihrilral dan leh inthiarna (zun in) lama hmalaknate hmanga teh a ni. He section bikah hian Aizawl khawpui hian point 1000-ah point 424 a hmu a, khawpui 73 zingah 55-na a ni. Independent Observer hi zirchiangtute’n a hmuna zir chianga mark an pek a ni a, hei hian mark 500 a pu a, Aizawl hian mark 352 hmuin 31-na a ni. Citizen Feedback-ah hian zawhna chhan tur chi 6 awmin mipuite’n an chhang a, percentage-a teh niin hemi bikah Aizawl hi 4-na niin a chungah Chandigarh, Gangtok leh Bhopal a intlar a ni.

Khawpui thlan chhuah zinga 28 chu India hmar lam khawpuite a ni a, chhim lam khawpui 15, thlang lam khawpui 15, chhak lam khawpui 7 leh hmarchhak khawpui 8 a tel.