Advertisement chhuah lovin RMSA zirtirtu 94 lak a ni tawh

ZORAM TODAY | November 3-16, 2015
Rashtriya Madhyamik Shiksa Abhiyan (RMSA) hnuaiah advertisement chhuah lovin Mizoram sawrkar chuan zirtirtu 94 a la tawh a; heng dân lova hna lakte hi kum 2011 atanga kum 2015 inkara lak an ni. Kumin January thla atanga May thla thleng khan mi 13 lak an ni bawk.
Right to Information (RTI) Act hmanga zawhna, Deputy State Project Director (RMSA), SPIO ni bawk C. Chawngthantluanga’n ziaka zawhna a chhan dan chuan, “RMSA hnuaia hna ruak apiang advertise a, interview-a dah khat zel tur chuan sum leh hun tam tak sên a ngaih avang leh CSS hnuaia temporary post mai a nih avangin hna ruakte hi casual vacancy anga dahkhah thin a ni,” a ti a. “RMSA hnuaia zirtirtu multi mode-ah Ministry of Human Resource Development (MHRD)-in B.Ed training vek tur a tih avangin vacancy hi hmanhmawh taka dahkha a ni,” tiin a ziak bawk.
 
Hetih lai hian The Employment Exchange (Compulsory Notification of Vacancy) Act, 1959 Section 3 (1) (c)-ah chuan, sawrkar hnuaia hna ruak awmte thla thum aia rei thawk tur hnawhkhah a nih dawn chuan Employment Exchange kaltlanga tarlan hmasaka, hemi zulzuia lak tur a ni, tih a awm a; RMSA hnuaia hna ruak hnawh khat tur hian Employment Exchange kaltlangin advertisement chhuah a ni lo thung. Tin, ‘Guidelines for the Recruitment of Teaching and Non-Teaching Employees of SSA and RMSA, Mizoram’-ah chuan, zirtirtu atana lak dan tur chiang taka ziah a ni a; chutah chuan zirtirtu lak (direct recruitment) dawnin advertisement chhuah ngei ngei tur a ni, tih a awm a ni.
 
Zawhna chhangtu C. Chawngthantluanga chuan, chhan hrang hrang avanga RMSA zirtirtu hna bansan an awm nual niin a sawi a, “Hengte hi hmun hrang hranga mi niin, hun hran hranah kalpah tak taka bang te an ni hlawm a, zirnain a tawrh lohna turin an hmun ruak hi hnawhkhat thin a ni,” a ti.

ZORAM TODAY zawhna chhangin Employment Exchange-a lehkhathiam hna zawng inziak lut pakhat, Aizawl Mission Veng-a cheng, sawrkar hna vawi tam tak lo dil tawh chuan, “SSA leh RMSA hnuaia hnathawk, hun laklawha banga an hmun ruak hnawhkhat turin sawrkarin advertisement chhuah ngat sela chuan lehkhathiam sang tel luh tuma theihtawp chhuah kan awm ang,” tiin a sawi a, “Advertisement chhuah lova lakluh tam zawk hi chu politician leh official-te duhsakna dawngtute an ni furin ka hria,” tiin a sawi bawk.

Mizoram sawrkar hnuaiah Sarva Shiksha Abhiyan (SSA) chuan kumin 2015 April thla thleng khan advertisement chhuah lo bawkin thawktu mi 58 an lo la tawh a, hei hi ZORAM TODAY issue hmasa (Vol. VI Issue No. 5 LINK)-ah chiang taka tarlan a ni tawh nghe nghe. RMSA pawhin hetiang bawka zirtirtu 94 lai an la leh chung hian, pawl leh mimal, Zoram mipuite hian ngaiah kan neih ta mai em ni aw tih theih tur khawpin, advertisement chhuaha la tha leh tura hmalakna nei an awm hriat a ni lo.
Advertisement chhuah lova RMSA zirtirtu lak te


1 thought on “Advertisement chhuah lovin RMSA zirtirtu 94 lak a ni tawh”

  1. Want To Increase Your ClickBank Traffic And Commissions?

    Bannerizer makes it easy for you to promote ClickBank products using banners, simply visit Bannerizer, and grab the banner codes for your chosen ClickBank products or use the Universal ClickBank Banner Rotator Tool to promote all of the available ClickBank products.

Comments are closed.