Sawrkar gazette-a chhuah loh chhuah anga lang a awm! Excise Department-in RTI zawhna chhang thei lo!

ZORAM TODAY | September 15-5 October, 2015
Tun hnaiah Excise & Narcotics Department chuan hmalakna tha tak tak neiin, ruihhlo man kawngah a thawhhlawk chho hle a; heng ruihhlo a mante leh ruihhlo tawlhrutu mante hi mipui hriata puanzar thin a ni. Nimahsela, information chiang zawk leh mumal zawk, dahthat tlak duhna avangin Right To Information Act 2005 tlawhchhana zawhna zawh reng reng chu an chhâng thei lo va, website lamah an hmalakna an update that bawk si loh avangin, RTI Act hmang tangkaitute a tibeidawng thin hle.


ZORAM TODAY chuan information kan hriat duh avangin RTI Act hmangin Excise & Narcotics Department-ah August ni 21, 2015 khan zawhna kan lo thehlut tawh a. Heng zawhna hi sawrkarin June ni 4, 2013-a notification (No. F. 13011/6/2005-IPR) a lo chhuah anga Excise & Narcotics Department hnathawh dan chu human rights bawhchhiatna leh corruption chungchang a nih loh chuan RTI Act hmanga dil chhuah theih loh zingah a tel, tiin zawhna an chhan theih loh thu a lo hriattir tawh a.

He notification chhuah hi mipuiin kan hriat loh avang leh, Official Gazette copy pawh hmuh a nih loh avangin Appellate Authority-ah zualko leh a ni a; heti chung pawhin zawhna hi chhan theih a la ni ta chuang lo a ni. Department Appellate Authority lamin chhan letna an siamah chuan, he notification gazette copy hi hmuh zawh loh a nih avangin, August ni 25, 2015-ah Official Gazette-ah chhuah leh a nih thu a lang bawk.

Official Gazette-a chhuah tawh nia sawi, Gazette copy hmuh zawh ni si loh hi a mak hle. Sawrkar Gazette reng reng hi Printing & Stationery Department lamin an hmuh ang angin an chhuah nghal zel thin a; hetianga Gazette copy hmuh zawh a ni lo hi Printing & Stationery Department thiam loh nge ni anga notification petu Information & Public Relation DSepartment thiam loh ni ang, tih chu zawhna lian tak a ni.

Hemi chungchangah hian
ZORAM TODAY zawhna chhangin Printing & Stationery Department hotute chuan, official Gazettte-a chhuah tura an dawn reng reng chu hmaih nei miah lova rang taka an tihchhuah nghal thin thu an sawi a, Excise & Narcotics Department chungchanga notification erawh chu an dawn loh leh, dawng chu ni se Gazette copy a awm ngei tur thu an sawi bawk. Hetih lai hian,  Information & Public Relation Department Secretary C. Thatkunga’n June ni 4, 2013-a notification a tihchhuah chu, Controller, Printing & Stationery hnenah official Gazette-a tihchhuah tura copy 5 thawn a nih thu a chuang thung.

Hetianga Gazette-a chhuah a lo nih tâk loh avangin, kum hnih kal taa I & PR notification official Gazette-a tihchhuah tur chu hmanni lawk, August ni 25 khan tihchhuah a ni ta chauh a nih chu! Satel dak phur an sawi chu nêp tê a ni âwm e.

Hetiang a nih avangin, Mizoram sawrkarin Excise & Narcotics Department hnathawh dan chu human rights bawhchhiatna leh corruption chungchang a nih loh chuan RTI Act hmanga dil chhuah theih loh zingah a tel tih chu August ni 25, 2015-ah Gazette-ah a chhuah chauh tihna a ni. Zoram Today-in RTI Act hmanga zawhna kan siam ni chu August ni 21, 2015 a ni a, official Gazette-a a chhuah hma a ni a; Gazette hian a huam pha lo va, zawhna pawh hi chhàn ngei tur niin a lang.

Hetianga mipui bengverh leh an hriat atan pawimawh tam tak awmna Excise & Narcotics Department-in RTI Act hmanga zawhna, a tê ber atanga a lian ber thlenga an chhang thei lo tawp hi a pawi hle a ni. Hetianga RTI Act hmanga zawhna an chhàn theih hauh loh laiin, department hotute chuan information chu press release emaw, press conference emaw neiin an chhuah leh thei thin tho si a!

RTI Act hmanga zawhna chhan theih hauh loh, department hotute’n an duh hun huna thuchhuah siama an tichhuak thei tho si hian ngaihtuahna a tithui a. Department khawih thila NGO lian thenkhatin hmalakna lian tak tak an neih thin avanga chung NGO-te’n hmingthat an hlawh thin vang a ni thei ang em, tih chu zawhna awm thei tak a ni. Hemi chungchang hi thuneitute lam hian enfiahin thutlukna dang siam thei se a duhawm hle ang.
—————–
 NOTIFICATION

No.F.13011/16/2005-IPR, the 4th June, 2013. In addition to this Department’s Notification No.F.13011/16/2005-IPR Dt.04.10.2012 and in exercise of the power conferred by Sub-Section (4) of Section 24 of the RTI Act, 2005, the Governor of Mizoram is pleased to exempt Excise & Narcotics Department from the purview of the RTI Act, 2005 on matters pertaining to disclosure of enforcement activities provided that the exemption will not include “information pertaining to allegations of corruption and Human Rights Violation.”
C. Thatkunga,
Secretary to the Govt. of Mizoram,
Information & Public Relations Department
——————-
Hei hi notification tihchhuah chu a ni a, a ngai ngaiin August ni 25, 2015 khan Official Gazette-a tihchhuah a ni chauh a ni!