Ramhlun Sports Complex ram buai leh in thiah: LC vrs DC

ZORAM TODAY | September 15-5 October, 2015
August ni 25, 2015 khan Mizoram sawrkar chuan Ramhlun Sports Complex-a Pu Zalara chenna in chu ‘dan lova sak’ tiin JCB hmangin a nawr chhia a nih kha. In nawr chhiatnaah hian Aizawl additional DC Lalhmunsanga Hnamte, Aizawl North SDPO VL Nghenga leh Land Revenue & Settlement Department hotute an tel a, in hi an nawr chhiat hmain bungrua singsak hmasaktir an ni. Hemi hnu hian eptu pawlte chuan sawrkar beih nan an hmang zui a, Aizawl DC Franklin Laltinkhuma leh Ramhlun Sports Complex Local Council te chuan press conference an nei ve ve tawh bawk.

A tirah chuan
Kum 2012 leh 2013-a leimin leh lei tlahniam avangin Ramhlun Sports Complex leh Ramhlun Vengthar khawtlang chuan harsatna nasa tak an tawk a, chhiatna avanga mahni in leh lova khawsa zui ngam lo chhungkaw tam tak chu Sports Complex building hrang hrangah khawsak lailawktir an ni. Hemi avang hian RSC Local Council chuan a tul angin hma a la nghal char char a, a hun laia bialtu MLA Pu H. Liansailova kaltlangin Chite kama ram lei dan tur ruahmanna chu state sorkarah an thlen a. State Disaster Management Authority chuan pawmin leimin zel tur venna check dam project sum, central atanga lo kal chu pawt pengin Ramhlun Sports Complex leh Ramhlun Vengthar mai bakah Aizawl Municipal huam chhunga chhiatna tawk, in leh lo chante awmna tur ram (LSC No. 3 of 1981) bigha 32.04 chu Pu Thansanga, Dawrpui hnen atangin 2013 kum tawp lam khan a lei ta a. Inthlan (Election) puan zui mai a nih avangin sorkarin duh angin hma a la chak thei lo a ni.

Hmalakna kal zel
November ni 18, 2013 khan NLUP Conference Hall-ah ‘meeting to discuss action plan for Control and Mitigation of landslide at Ramhlun Sports Complex and Ramhlun Vengthar’ neih niin ruahmanna hrang hrang siam a ni a, sorkar department hrang hrang aiawhte bakah veng pahnih Local Council leh disaster management committee aiawhte an tel. He hunah hian report hrang hrang pek a nih bakah ram lei thar luah thei tur category 3-ah then niin chumi mil chuan ram pek tur a tih a ni bawk. (Category then dan hi Mizoram Gazette Vol. XLIII – Issue No. 72-ah kimchanga tarlan a ni.)


Nikum, 2014 June thla chhung khan Land Revenue & Settlement Department-a surveyor 4-te’n helai ram hi endikin house plan an siam a, a ram map hi an siam nghal bawk a, chu chu pawm nghal a ni.  Tichuan, category I-ah mi 17 hnenah ram pek an ni a, category II-ah mi 42 hnenah pek a ni a, category III-ah erawh an awm lo thung. RTI hmanga kan zawhna SDO (Sadar), Aizawl District chhannaah, heng list-a awm mi 59-te bak hi tuma hnenah ram pek a ni lo va, re-habilitation & Re-Settlement area-ah hian Ramhlun Sports Complex Local Council te hi thuneihna pek an ni lo tia tarlan a ni bawk.]

Harsatna a awm
July thla vel atangin helai ram hi a luahtu turte’n an chei bawl tan a, vengchhung mipuite atangin sawi leh sel neuh neuh a awm avangin Ramhlun Sports Complex Branch YMA chuan Office Bearers’ meeting neiin thil awmdan an enho va. Sorkar hriatpuina ni lova ram inpek leh ram hralh bakah thil fel tawk lo tam tak awma an hriat avangin August ni 13, 2014 khan Chief Minister hnenah helai ram chhui chiansak tura ngenna lehkha thehlutin sorkar lamin a tul angin hma a la nghal char char a.

Hmalakna bawhzuina hi Aizawl D.C. Franklin Laltinkhuma’n ziakin Minister, DM&R hnenah report hetiang hian June ni 26, 2015 khan a thlen a (lehkha pawimawh hrang hrang a thil tel bawk):

“…Ramhlun Sports Complex L.C te’n anmahni council member-te hnenah sorkar ram acquired area chhunga ram an inpek mai bakah in hmun 4 anmahni thuin an lo hralh ringawt a… Acquired area pawn pawh ni se, sawrkar thu lo chuan ram an inpe thei lo hrim hrim a ni.

Hemi chungchangah hian The Mizoram (Prevention of Government Land Encroachment) Act, 2001 hnuaiah Settlement officer Aizawl chuan hearing a neih fel vek hnuin ni 29.5.2015 khan Zalara hnenah a in sak lai thiahna thupek a chhuah a, ni 25 chhunga thiat vek turin a ti a ni…”
[Ref. Aizawl D.C, DM&R Branch. No.C.16011/137/2013-DC(A), June ni 16, 2015]

Pu Zalara in thiah
Sorkar thuchhuahin a tarlan danin acquired area chhungah hian Local Council-te’n anmahni leh tlangau Pu Zalara hnenah ram inpein midang 4 hnenah an hralh bawk a, hei hi dan kalh a nih avangin hemi huam chhunga kut thlakte hnenah sorkarin March ni 9, 2015 khan stay order pein a ngaichang a. Pu Zalara hnenah hian eviction notice a pe tawh chungin a sa lui zel a, August ni 25 khan a insak lai chu a thena zar a nawr chhiatsak ta ni.

Hemi chungchangah hian RSC Local Council an lungawi lo hle a, mi rethei in thiahsak a ni mai chu intham lohna leh inngaihpawimawh lohna lian tak a nih thu an sawi.

Pu Zalara in thiah chungchangah Aizawl D.C chuan thu thar thehdarhtute kawmin stay order pek a ni tawh chunga a la sak luih zel avanga hetia hma la ta hi niin a sawi a, a chunga kan tarlan tak report thenkhat hi ziakin a sem bawk.

Local Council thu
September ni 9, 2015 khan Ramhlun Sports Complex Local Council chuan thu thar thehdarhtute kawmin thlanmual ram tur (a chhengchhe lai) an hralhah khawtlang tana thil tha an duhna avanga dan bawhchhiatna an lo nei palh a nih chuan thupha an chawi a, rilru thianghlim tak pu chunga ti an nih thu an sawi. (Ram hi mi 4 hnenah Rs. 3,50,000-in an hralh a ni). An ram hralhna hi field tur ram laih zawl nan te, community hall hmun tur laih nan leh thlanmual panna kawng tur laih nan an hman thu an tarlang.

Tin, RSC Branch YMA-in CM hnena lehkha an thehluh chungchanga zawhna chu chhangin “Ram awl lai hi congress unit president fapa leh unit hruaitu dang 8 insem turin an dil a, mahse phalsak a ni lo. Congress unit president pasal hi YMA President a ni a, ani hian committee pawh ko lovin complaint a thehlut a ni,” an ti.

DC-in media kawm
September ni 9 vek chawhnu lam khan Aizawl DC chuan thuthar thehdarhtute kawm ve lehin RSC Local Council te ram inpek chu sorkar ram lei chin ngei a nih thu a tarlang nawn leh a. Helai ram leia footpath siam nan hian a hun laia LC chairman Pu Parliana hnenah Rs. 2,60,000 hlan niin kawng siam nan Rs. 15,00,000 chu DM&R Department sum hman a nih thu a sawi a, hemi a nih avang hian an ram hralhna Rs. 3,50,000 chu vantlang tana an hman a rinawm loh thu a tarlang tel bawk.

Pu Thansanga thuchhuah
Sorkar ram leiah buaina neuh neuh a awm avangin a hmaa ram neitu Pu Thansanga, Zion Street, Dawrpui chuan ni 9.9.2015 khan hetiang hian thuchhuah a siam:


“Chite rehabilitation site atan hian R.S.C Local Council-te’n min dawr hmasa ber a. Ram bang a awm chuan LC kutah dah turin mi ngen a. Ram hi LC lei tur nia ka ngaih avang leh vantlang tana ram hi ti nia ka rin avangin ka lo aw ve mai a.

Amaherawhchu, Land Acquisition (ram lak) hi DC, Aizawl-in a tih tak avangin, ram awl a awm leh awm loh ka va zawt a. Ram awl a awm lo, DC Office-in an tih avangin LC kuta dah tur ram a awm ta lo a ni.”
  tiin.

RSC Congress Unit President kam chhuak
RSC Local Council te’n Spetember ni 9-a an press conference-a RSC Congress Unit President chungchang an sawi chu Zoram Today-in a kawmnaah congress unit president chuan, “Kan veng YMA  chanchinbu Zamzo Vol. XVIII Issue 31 (10.8.2014) ah Lalhuthanga, LC Treasurer chuan ‘kan tum anga kan tifel thei a nih chuan ram lu lam hi member-te insahthlak ve ila, mipui pawhin min hrethiam ve em em ang tiin inthlahrung lo takin kan ti ve a ni’  tiin a ziak a. Mi 7-in ram chu an insem ta a. Heti a nih chuan kan ruling lai te a ni ve bawk a, kan unit hruaitu zinga in hmun nei lo leh a mamawhte tan dil ve ni se tiin kan rel a. Kan dilna hi sorkar chuan a ngai pawimawh a, surveyor-te pawh a lo tir hial a ni. Hetih mek lai hian veng chhungah titi leng vak a tamin YMA-te’n CM hnenah hial ram humhalh leh enfiah tura ngenna an thlen takah chuan kan dilna pawh bawhzui lovin ram hi humhalh ni zawk rawh se tiin ni 30 September, 2014 khan a concern minister hnenah lehkha kan thehlut leh ta zawk a ni,” tiin a sawi.

“Lo hlawhtlingin ram chu min pe pawh ni se, dan ang thlapa dil leh pek kan nih dawn avangin a dik lohna reng reng kan hre chuang lo,” tiin a sawi bawk.

“YMA-in nikuma Chief Minister hnena lehkha kan thehluh kha file-ah dah a ni a, a la en leh leh vek theih a, khatah khan YMA chuan thil fel lo awmin kan hria a, min enfiahsak turin kan ngen mai a ni a, YMA-in information dik lo kan pe anga min thantir hi a nâ kan ti ve hle. Tumah kan hêk lo va, kan lehkha kha ngun taka ennawn leh ngat kan ngam,” tiin Ramhlun Sports Complex YMA hruaitu pakhat chuan ZORAM TODAY a hrilh a ni.