Kebul chunga Mount Everest ngamtu Arunima Sinha

ZORAM TODAY | November 3-16, 2015 Kimi Colney
 Arunima Sinha tih hming hi in hre tawh ngai em? Kan ramah hian he hming hi huaisenna leh ngilneihna entirtu ropui tak a ni asin. 
Uttar Pradesh khawpui Lucknow atanga km 200-a hlaa awm, Ambedkar Nagar khuaah chuan Arunima Sinha hi kum 1988-ah a lo piang a; a pa hi army-ah engineer niin a nu chu health department-ah supervisor a ni bawk. Kum thum a nih laiin a pain a thihsan a, a nu leh a unau pahnih dang nen an chengho a ni.

Arunima te chhungkua hi infiamna ngaina tak an ni a, a naupan têt atanga infiamna chi hrang hrang khelin, taksa insawizawina lam hrim hrim hi a ngaina hle. Football leh volleyball a khel nasa zual a, volleyball-ah phei chuan ram aiawhin a lo chhuak tawh nghe nghe.
 
MA a zir chhuah hnuah dân (law) lampang a zir chho va, hmabak êng tak beiseiin a zir chhuak a, mahse, a rin angin hlawhtlinna chu a hmuh phakah a rawn inchhawp chhuak mai lo. Kum 2011-ah chuan CISF (Central Industrial Security Force)-ah hna dilin a hna dil exam tur chuan Delhi a pan a, a dam chhunga a nun thlak thawktu tur a tawng ta a ni.

April ni 11, 2011 a ni a; Padmavat Express-a general compartment-ah a chuang a, mi an tam em em a, thutna a chang ve thei hram a. A rel chuan lai vel te chuan a hma lam hun suangtuahin a hlim hle. Chutih lai tak chuan suamhmang pali an lo lang a, khawvela a rohlu ber mai, a nu pek ngei rangkachak thi chu chhuhsak tumin an rawn tibuai ta a. Uttar Pradesh state chhungah hian general compartment-a hetiang thil thleng hi thil mak a ni lo, tum dangah pawh a lo thleng fo tawh a ni. Arunima chu hmeichhia amah maia zin a nih avangin an zuam deuh a ni ngei ang. A thi chu pe duh lovin a a theih ang tawkin a lo bei lêt a, a pêt a, a lo hnek bawk a. A tawpah suamhmang mi pali tihngaihna hre lo chuan, a kut leh ke-ah vuanin rel atang chuan an paih chhuak ta a.

Rel kawngah tak a tla a, rei lo te hnua rel lo tlan chuan, a insaseng hmain a ke vei lam a rawn chîl a. Chêt pawh che thei tawh lovin na tuar chungin a mu reng a, thi a chhuak nasa hle. Tanpuitu hnaivai an awm si lo, sazu te chuan a hliam an rawn pan thin a, rel tlan ri-ah an tlan darh leh thin. Nâ a ti lutuk chu a tê nasa hle a, a hnuah phei chuan nikhawhrelovin a awm leh ta a ni.

A tuk khua a var chuan a bul hnai thingtlangmi veivakte chuan an rawn hmu a,  Bareilly District Hospital-ah an hruai a. Sawrkar lamah thil tihfel phawt a ngai si, hnathawkte chuan an lo ngaihsak lo em em zui a, hliam tuar chung pawhin platform-ah darkar tam a awm phah a ni. Hospital an thlen chuan a tana tha zawk tura ngaiin, a khup achin hnuai lam zawng chu paih a lo ngai ta! A hospital hmanraw neihin duhthu a sam lo em em a, an zai laia a nâ lo chhawk tur hnimhlum (anaesthesia) takngial pawh an nei lo a ni. Duhthlan tur dang nei hek lo, a harh reng lai chuan a ke an tan ta a nih chu! Chu mai a la ni lo, chutia a mut reng lai chuan, ui pakhat hi lo lutin, a ke an tan tâk chu a rawn khel ta bap bap mai a nih chu!

An buaipui lai chuan a chanchin chu news lamah a lo darh a, chutia mahnia hmeichhe zin rel lai atanga paih a ni chu mi khawngaih a hlawh hle a, sawrkar beng a thleng ta hial a. Sports Minister chuan AIIMS-ah tha zawka enkawl a nih theih nan ruahmanna a siam ta hial a ni. Mi tam takin a chanchin an ngaihven a, zawhna a dawng hnem hle. A chunga thil thlenga tunge mawhphur tiin mipui zawhna a tam hle a, police-te chuan kut sil tumin Arunima Sinha chu a thiam loh an ti tlat mai. A tirah chuan, ticket tel lova a zin avangin ticket khawntu a lo kal laiin a zuang chhuak, an ti phawt a. CCTV-ah a ticket lei lai chiang taka a lo lang ta si a; mahni intihhlum tuma zuangthlaah an puh leh ta zel a.

Ani chu damdawiin a mutna khumah chung thilte chu ngun takin a ngaihtuah a. Dik lo taka amah beitute chu ‘Vawiin hi i ni a ni a, i duhtawkin che rawh. Mahse, engtikah emaw chuan ka chunga thil thleng diktak hi ka la pho chhuak ngei ngei ang’ tiin amah leh amah a infuih nasa hle.

A ke veilam an tan bakah a ke ding lam chu a ruh tinghet turin rod an phum bawk. Chutianga dinhmun khirhkhan taka a awm lai chuan khawvela tlang sang ber, Mount Everest lawn turin thutlukna a siam ta mauh mai! A nunna lak pawh hreh lotu an awm chu a rilru a na em em a, mahse, a tum tihruh nan leh a tuang tihchhah nan a hmang ta sauh sauh va. A thil tum chu a bula awmte leh doctor-te hnena a han sawi chuan a rilru buaiah hial an ngaihsak a ni.
A ke veilam khup chinah chuan a kal theihna turin ke lem, prosthetic limb an tih chu an vuahsak a. Mi tam tak chuan ke lem hmang thiam tur leh, taksain ngaia a neih theih nan hun rei tak tak, kum hial a duh thin a, mahse, a tumruhna avangin Arunima chu ni hnih chhung lekin a ke lem hmangin pangngai takin a kal thei!

Hospital atanga a chhuah veleh Indian hmeichhe zinga Mount Everest lawn chhuak hmasa ber, Bachendri Pal chu phone hmangin a bia a, ani hian thurawn bakah fuihna tam tak a lo pe a. Nehru Institute of Mountaineering-ah basic course a zir a, chumi hnuah thla 18 chhung ngawrh takin training a nei leh a. Mount Everest lawn turin Island Peak-ah 2012 khan a lawn hmasa phawt a ni.

Mount Everest-a lawn hian a ke lem chuan harsatna a siam nasa hle. Tlang lawn chiah hian a ke lem kerek lai leh keartui vel chu a kûl tlat zel a, a ke dinglamah lah thir phum a lo ni bawk nen, a thiante chuan mahni inhremah riak an ngaihsak a. Tlang chhip thleng turin camp pali tan tlang a ngai a, camp palina atanga tlang chhip chu feet 3500 a ni. Hemi inkarah hian tlanglawnmi chesuala thi ta an tam em avangin a hmingah pawh ‘Death Zone’ an vuah hial a. Arunima pawh he hmuna a lawn lai ngei hian a bul velah ruang tam tak a hmu nghe nghe (vur hmun a nih avangin ruangte an tawih lem lo). Chungte chu a hmuhin, hlauhthawnna nei mah se, beiseina leh tumruhna nen May ni 21, 2013-ah khawvela tlang sang ber chu ke bul chungin a lawn chhuak ta a ni.

Tlang a lawn lai hian oxygen a tlem avangin harsatna a tawk a, a hruaitu chuan, “I la thâwk theih lai hian let leh la, ni dangah i lawn leh mai dawn nia,” a tih pawhin a duh tlat lo va, a tawpah  tlang chhipah India flag leh a pathian lem dahin thla a la a, a lêt leh ta a, Hetih lai hian a oxygen pai a zo têp a; pen sawmnga vel a pên hnuah chuan a oxygen a zo ta a ni. Chutia oxygen nei tawh lova a tlûk lai chuan, vanneih asiamin a bulah oxygen bur a hmu hlauh mai! Chumi hmangin dam takin a lêt leh thei ta hram a ni.

Arunima Sinha hi a lo namailo takzet! Mount Everest bakah Kilimanjaro (Africa) te, Elbrus (Europe) leh Kosciuszko (Australia) tlang te a lawn chhuak tawh. Tunah hian rualbanlo sikul Shahid Chandrashekhar Azad Khel Academy a hawng a, heng naupangte hi training pein theihtawp a chhuah a, a hlimpui thin hle.

Arunima Sinha hi hmeichhe rualbanlo Mount Everest lawn chhuak hmasa ber a ni a, hei vang hian Padma Shri award a dawng tawh a ni. A lehkhabu ziah ‘Born Again on the Mountain’ Prime Minister Narendra Modi chuan December ni 12, 2015 khan a tlangzarh nghe nghe.
 ——————
Damdawiina a awm lai hian Arunima Sinha chuan Indian Sports Ministry atangin zangnadawmna cheng 25000 (US$380) a dawng a; Ajay Maken, Minister of State for Youth Affairs and Sports chuan inenkawl nan cheng 2,00,000 (US$3,000) a pek belh a; a hna dil CISF-a a luh theihna turin a sawipui bawk. Hei bakah Indian Railways pawhin hna an zawrh bawk a ni.

Police-hovin mahni intihhlum tuma an sawi chu, Arunima Sinha hian a khing let a, Allahabad high court chuan Indian Railways chu thu pein, Sinha hnenah zangnadawmna cheng 5,00,000 (US$7,500) pe turin a ti zui a ni. April ni 18, 2011 khan All India Institute of Medical Sciences-ah inenkawlin a awm a, thla li chhung teh meuh mai a awm. A ke lem hi Delhi-a company pakhatin an tumsak a ni.