Hmelhriat loh tana nun chân ngam

ZORAM TODAY | October 6-19 October, 2015Kimi Colney

Tihian han ngaihtuah teh. Hun khirh leh manganthlak tak tawk ta la, i hmelhriat ngai miah lote tan i nunna i pe thei ang em? I duh thlanaah, nangmah nge i kianga mite i dah pawimawh hmasak ber ang?

Neerja Bhanot hi naute hmeltha tak leh duhawm tak niin September ni 7, 1963-ah Rama Bhanot leh Harish Bhanot te hlimna leh lawmna ber ni turin a lo piang a. Fapa pahnih an lo neih tawh avangin fanu neih an duh thu Pathian hnenah an thlen fo va, a nu leh pate tawngtaina chhanna duhawm tak a lo ni ta a ni.

 

A nun hman chhoh dan tawi tê han sawi ila. Neerja Bhanot hi Sacred Heart School, Chandigarh-ah leh Bombay Scottish High School-ah te zirna kawng a zawh a. Kum 1985-ah March thla khan Neerja Bhanot hian inngaihzawng lawk lem lovin arrange marriage an tih ang khan pasal a lo nei tawh a, Gulf lamah a zui a ni. Hun hlimawm leh hmangaihna chatuan tawmpui tura a ngaih a pasal chu a rin dan a lo ni hauh lo mai. Dowry chungchangah lungawi lovin a pasal hian a tiduhdah em em a, tichuan, thla hnih lek a ral hnuah an inthen leh ta a ni. 

Hetia an nupa boruak a chhiat takah chuan an khaw lam, Mumbai-ah hawin, modelling lamah te a lut tan a. Chu chu duhtawk lovin, flight attendant hna thawk turin Pan Am Airline-ah dilna a thehlut a, diltu singkhat dawn zinga thlan chhuah pawlah a tel ve hlauh mai. A tlin hnuah training turin Miami-ah an thawn a, mahse, hetah hian flight attendant training tura kal si kha a thiamna leh a theihnain a tlin em avang in flight purser, thlawhna chhunga hna chelh zinga thu pawl ni turin an lo ruat nghal a ni.
 
Hetia Neerja Bhanot-in senior flight purser nihna pawimawh tak a chelh lai hian an thlawhnain buaina lian tak a tawk ta hlauh mai le! Kum 1986, September ni 5, a kum sawmhnih pathum tlinna hma lawk a ni a, Pan Am flight 73 chu chhum karah a thlawk ta vang vang mai. He thlawhnaa chuangte’n an hriat miah loh chu, an zingah khan ‘Abu Nidal Organization’ tih terrorist group, Libya ram mite an thu ve reng tih hi a ni. Chung mite chu rawng taka chein chu thlawhna chu an hruai kawi (hijack) ta a. He thlawhnaa chuang (passenger)-te’n an hriat loh pakhat leh dang chu, an zingah angel anga rilru tha leh duhawm em em pu chu a thu ve reng a ni tih hi.

Lei an thlen hnuin he thlawhna pilot, co-pilot leh chief engineer-te chu thlawhna passenger 400 chuangte chu phatsanin an tlanbo va, chuvangin Neerja Bhanot chuan thlawhna chhung mawhphurna a kutah a la a, thlawhna chuangte nun chhanhim a nih theihna turin a tih theih ang ang chu a ti kual char char a.
 
Heng terrorist-te’na an tinzawn ber chu American mi niin, chungmite an hriat theih nan passenger-te chu an passport khawnsak vek turin Neerja Bhanot chu an hrilh a, mahse, ani chuan an thu awih duh lovin, passenger-te passport chu a ti riral vek a. Chu chu a nunna atan hlauhawm tak a ni.

Darkar 17 vel a liam hnu chuan chung terrorist-te chuan an silai leh puakthei chi hrang hrang hmangin midang  an rikrap tan ta a. Chutiang thil a thlen mek lai chuan Neerja chuan a rang thei ang berin emergency exit a hawng nghal a, passenger tam tak chu a chhanchhuak ta phawt mai.

Silaia an kaha hliam na tak a tawrh hnu pawhin a natna a ngaihtuah hman lo, passenger-te himna ngaihtuahin theihtawp a la chhuah fan a, a tam thei ang ber chhanchhuah kha a tum a ni tawp mai. Thlawhna atanga tlan chhuah tum an hmuh chuan terrorist-te chuan kah mai an tum thin a, chu chu Neerja Bhanot chuan ngaingam lovin, an silai kaw hmaah a lo ding thin a, a nunna chu a passenger-te tan a tawktawrh thin. Chumi a nih avang chuan silaimu pawh a dawng ve nual a. An han chhanchhuah meuh chuan silaimu pathum ngawt chu a taksain a lo dawng hman a, damdawiin lam pana an hruai laiin a hnuk a chat ta a ni.
 
Ni hnih hnu lawka pianchampha lawma kum 23 tling mai tawh tur a ni a; September ni 7-ah chuan a chhungte’n hlim takin an lo hmuak ang a, hlim takin pianchampha an lawmho dial dial ang chu tia ruahmanna an neih mek laiin, chu ni-ah ngei mai chuan Neerja ruang chu an hmuak ta zawk a, a hmelthat vanglai takin Neerja chuan midang tan a nun a hlãn ta a ni.

Passenger dam chhuakte’n an theihnghilh theih ngai loh, an hriat reng chu, Neerja Bhanoti nui hmel kha a ni. An sawi dan chuan, “Rilru mangang leh beidawng taka kan awm lai pawhin, ani chu a lo nui sáng reng a, hei hian min thlamuan em em a ni. Hliam a tawrh hnu pawhin, a tih theih apiang chu a la ti tang tang reng a, ani hi kan buaina tawh laia kan hero a ni,” an ti.

He nula hmeltha tak, hmabak êng tak nei mek dinhmunah ding la, kristian-te’n kan vengte hmangaih tura kan inzirtir ang hian, kan bula mi kan kan hriat hauh si lohte tan nunna kan hlãn ve ngam ang em le?

Neerja Bhanat thiltih hian mi ngaihsan a hlawh em em a, tunah hian a chanchin behchhana movie siam tum mek a ni. A thih hnu hian chawimawina thahnem tak a dawng tawh a, chung zingah chuan ‘Ashoka Chakra Award’ leh ‘Justice for Crime Award’ te a tel a ni.