India champion Muaythai team-te MAM-in lawmpuina hun an hmang

ZORAM TODAY: Nimin May 28, 2018 (Thawhlehni) khan an hmunpui (Main training Centre), Chaltlang-ah Muaythai Association of Mizoram (MAM) chuan Senior National Muaythai Championship-a feh chhuak lo hawte pualin hun an hmang a, pangparthi nen lo lawmin an pualin thingpui ruai an kilho.
 
He hun hi Samuel Lalrozama Hmar, Vice President, MAM chuan kaihruaiin President Brian Lalnunhlima, General Secretary H. Lalmuanpuia bakah Mizoram team coach V. Lalmuankima leh Manager Andrew Lalnunmawia te’n thusawina hun hmangin report an pe a, Sr.Vice President C. Lalenga chuan fuihna leh lawmpuina thu a sawi bawk.

MAM President Brian Lalnunhlima chuan, “Kan theihna sang ber leh beiseina nen Pathian rawn chungin kan feh chhuak a, malsawmna kan dawn hi kan beisei phak bak a ni. Vawiin hian Mizoram Muaythai chuan bung thar a kai a, he hun hi kan hre reng tawh ang” a ti.

General Secretary H. Lalmuanpuia pawhin thu sawiin, “Federation hnuaiah India-a players nei tha ber chu Mizoram kan ni tawh a, junior lamah phei chuan kan tha lehzual. India ram chauh kan thlir lo va, Asia leh World championship kan thlir avangin tun atanga rei loteah khawvel huap inelna lian zawkahte Mizo chanchin kan hriat thuai beisei ang. Kumin hian hmachhawp kan ngah takzet a, kan players-te’n inthlahdahna hun an nei dawn lo,” a ti bawk.

May ni 18-21, 2018 chhung khan Himachal Pradesh khawpui pakhat Mandi-ah 18th Senior National Muaythai Championship neih a ni a, Mizoram team chu a pumpuiah pakhatna niin gold medal 9 leh silver medal 1 an dawng a, May ni 27 khan Aizawl an lo thleng. Kum 2004-a he pawl a din hnuah National level-a an chet that ber tum a la ni. Pahnihna chu Delhi niin Uttar Pradesh pathumna an ni bawk.