India rama Sports University hmasa ber Manipur-ah

ZORAM TODAY: May ni 23, 2018 (Nilaini) khan Union Cabinet thu khawm chuan Manipur-a India rama sports university hmasa ber dinna tur dan an pawm. He dan hi kum 2017 August thlaa Lok Sabha-a an bill pharh anga kalpui tur a ni ang.

Report-a a lan danin, Law Minister Ravi Shankar Prasad chuan Imphal khawthlang lama din tur Sports University bill hi Parliament-ah a pending reng tawh thu sawiin, Cabinet-in a pass takah chuan, President-in he bill pawmpuina a sign ang a, chumi hnuah chak taka hma lak zui a ni dawn a ni,” a ti a, Manipur sawrkar pawhin he university dinna hmun tur an tihfel tawh thu a sawi bawk.

Bill-a tarlan a nih danin, athlete leh coach lam zirna course daha bul tan a ni dawn a; sports science, sports technology leh training hrang hrang tha zawkte he university-ah neih a ni ang. He university atang hian degree, diploma leh certificate pek chhuah theih a ni ang a, India ram hmun dangah campus leh study centre hawn theih a ni dawn bawk a ni.
National sports university din tum a nih thu hi Prime Minister Narendra Modi chuan a lo puang tawh a, kum 2014-15 budget atangin cheng vaibelchhe 100 dah a ni tawh nghe nghe.