Mizorama basketball inelna sang ber Mizoram Super League

ZORAM TODAY | March 1-14, 2016 -Fela Ngente

Mizoram Premier League tan atanga thla ruk hnu lekah Mizoram football team chuan Santosh Trophy (National Football Championship) nomawi a chawi nghal der a. MPL chu football a hmasawnna thlentu lian ber a tih theih hial ang. Tichuan, 2015 kum tawp lam khan MPL buatsaihtute zing ami ZONET cable TV chuan ngaihtuahna thar sengin basketball lama hmasawnna tur league pawimawh buatsaih zai a rel leh ta a.


Mizorama basketball-a inelna lian ber chu Mizoram Basketball Association nen tangkawpin kum 5 chhung atan thawhhona thuthlung an ziak ta rup mai a, a hmingah ‘Mizoram Super League’ tih an vuah ta a ni. Zonet Cable TV Pvt. Ltd. hian kum 5 chhung atan cheng nuai 20 an theh chhuak a, MBBA lamin technical lam leh sum mamawh dang an buaipui thung. Kum 2015 khan MSL season hmasa ber chu khelh niin a hlawhtling hle a. Club 6 awm zingah Khatla TBL chuan champion nomawi an chawi a, tunah hian an la kawl mek a ni.

Tichuan, tunah hian MSL thawh hnihna chu khelh leh mek niin Hawla Indoor Stadium, Pitarte tlang, Republic vengah khelh thin a ni. Season hmasa nen a kalphung a inang lo hret a, vawi khat theuh an inkhelh kual hnuah a point hmu sang 4-in semi final an khel ang a, vawi 3 khelha a tithain final match an khel leh ang a, vawi 3 khelha a chak tam zawk hi champion an ni mai dawn a ni. Tin, league match lama point hmu hniam ber hian season tharah MSL an khelh a rem tawh dawn lo va, a hniam ber dawttuin playoff an khelh a ngai bawk dawn.

Club te hian season khat chhungin inrelbawl nan cheng 50,000 tal an neih a ngai a. An player-te pawhin contract puitling an neih vek a tul bawk. Tun season-a club hrang hrang player leh club dinhmun i’n thlir thuak thuak teh ang.

1. Mission Veng Vikings : ‘Get Serious, Get Vikings’ ti thin Vikings Basketball Club hi kum 1997-a din tawh niin Mizoramah na na na chuan club hlun ber zing ami a ni. An club-ah hian sub-committee hrang hrang 4 awmin L.H. Thangkima Khiangte chu club chairman a ni. Khiangte Trade Centre, Samsung Plaza leh Zothan Auto Works bakah mi thahnemngaite’n club mamawh hrang hrang an tum thin. Anni club hian fans club pawh an nei nghe nghe. Season hmasa lamah 4-na niin kumin hian champion an tum ruh hle a. An key player Lalrina Renthlei hovin sang taka invawrh an tum a ni.

2. Khatla TBL : Anni hi champion lai an nih mai bakah season hmasaa Most Valuable Player Mapuia (ex-India International Player) coach-na hnuaia khel an ni a, an nomawi humhim an tum ruh hle. An club-ah hian Board of Directors dinin member 25-in an club inrelbawlna lam an buaipui thin.  Kum 2003-a din niin MBBA League title 7 lai an kawl tawh a, tawnhriat an nei tha tawh viau a ni. TBL leh BZ Ice Cream-in an sponsor a, an club inenkawlna pawh a felfai hle a ni.

3. Tuikual South : MSL-ah chuan club naupang ber an ni a, kum 2014 December thlaa indin chauh niin sub-committee 3 bakah fans club te an nei a, season hmasaah an duhthusamin khel lo mah se tun season-ah hi chuan champion ngei an tum tawh a ni. Coach K.C. Lalliantluanga hnuaiah theihtawpin an khel chho zel a. An tum ram thleng ngei turin tan an la nasa hle.

4. Zarkawt Serpents : December ni 20, 1995 kuma thianzaho din Serpents hi MSL-ah chuan a club upa ber a ni hial awm e. Hun eng emaw chen thawm nei lova an awm hnuin 2012-ah khan thar thawh leh a ni a. 3rd division leh 2nd division-ah te champion chhovin 1st division runner up an ni a, MSL hi an inhlangkai chho a ni. A club dintute hian tawnhriat an nei tha hlawm hle. Tunah hian club board member an la nih vek avangin an tang hle a, Hminga, Sangkima leh Lianhmingmawia te zarah champion ngei an tum.

5. Chaltlang Ryders : Kum 1997-a din he club hi kum 2001 thleng tluang takin a kal a, trophy pawh an la hman nual a ni. Zirna avanga player-te an awm darh avangin an tawp lailawk a, kum 2013-ah din thar lehin MBBA 3rd divison-ah an champion leh nghal a, a kum lehah 2nd division-ah champion lehin MSL zinkawng an zawh chho a ni. Season hmasa lamah a mawngphah an nih avangin an tang thar hle a, an player lak thar kawngah an fimkhur phah a, tunah chuan fit 6 pel ringawt pawh player 3 lai an nei nghe nghe a, an captain Richard-a hovin champion ngei an tum.

6. Zarkawt BCA: Nikum lam finalist BCA hian kuminah hian champion ngei an tum ruh hle a, club hruaitute leh players te nasa takin an inbuatsaih a. Players pawh inlak belhin an squad pawh a chha tha viau a ni. Hotel Regency leh Inkspot lamin sponsorship an ti a, club inrelbawlna nei tha ber zinga mi an ni bawk.