Hero ISL hmasa bera Indian goal thun tam ber Jeje Lalpekhlua

ZORAM TODAY | November 3-16, 2015
Kum zabi 20-na tawp lam, Pawl Kut Thla ni 7 khan Hnahthial Hospital-ah F. Liankima leh Hnunpuii te fa paruk zinga a naupang ber ni ta, naute duhawm tak a lo piang a, chu naute chuan India mipui maktaduai eng emaw zat aiawhin ball a la pet dawn tih tumah rengin an ring phak lo vang. Tudang ni lovin Jeje Lalpekhlua – Hnahthial khua mai ni lo, Mizoram mai pawh ni lo, India ram aiawha a hmatawnga football khel thin chu a ni. Hero-Indian Super League (ISL) season hmasa ber, kum 2014-ah khan Chennaiyin FC tan khelin goal 4 a thun a, Indian player zinga goal thun hnem ber a ni. Jeje-a hi ZORAM TODAY chuan biakna remchang kan nei thei hlauh a, a chungah kan lawm hle a ni.

Ball pet chauh lo deuh, infiamna dang tih thin te i nei em?
Ka naupan têt atangin infiamna lam hi ka tui em em a, thiam em em lo mah ila a vantlang tawk hi chuan ka ti ve thei nual thin. Tennis-ah pawh Mizoram Open Sub-Junior ah te ka lo chhuak ve tawh a ni. Tin, table tennis leh badminton te hi ka khel ve nasa a, boxing thlengin ka khel ve bawk. Boxing bikah pawh hian Mizoram Open-ah te ka lo chhuak ve tawh a, mahse, ka kum a naupan viau laiin ka bûk a lo rit ve thin bawk si a. Kan unau zinga upa ber rual velte nen kan inhnek tawk fo va, ka chhungte’n an remtih tak loh avangin boxing chu ka naupan laiin ka chawlhsan ta a ni.

In chhungkuaah midang infiammi an awm ve reng em?
Kan chhungkua hrim hrim hi infiamnaah kan tui em em a. Ka pa hian football mai lo pawh infiamna hrang hrang wrestling thlengin a lo khel ve nasa thin. Football-ah pawh hian kan veng team-ah ka u nen an khel dun hman a ni. Ka chhungte hian inkhel tawh lo turin an ti thin a, kei erawh chuan inkhel turin ka fuih char char thung. Ka pa nau, F. Lianhmingthanga pawh hi tun hmaa inkhelh ngaina deuh ho kha chuan an hmelhriat deuh fur ang. Mizoram aiawh pawhin a lo khel ve nual tawh a, Mizoram leh Russia club te’n Bordoloi Trophy, Silchar-a an intum tum (niin ka hria) pawhin goal a lo thun tawh a ni. Infiamna lamah hi chuan kan chhung hian kan tui a ni ber mai.

Engtik atanga inkhel tan nge i nih?
Naupan lai atangin ka inkhel nasa a, kan in bula volleyball court-ah thiante nen kan inkhel nasa thin khawp mai. Inkhel tura thiante sawm khawmtu ber ka ni thin a, team kan siam a, rialno leh thingfak inchawiin kan inkhel nasa thin hle. Sikul chawlh phei hi chuan kan inkhel nasa lehzual a – khua a lum emaw a vawt emaw, ni a sa emaw sa lo emaw, ruah a sur emaw sur lo emaw, nilenga inkhelh turah kan ngai tawp thin.

I khelh tawhnaah khawi club nge nuam i tih ber? Enge a chhan?
Ka club khelh tawhnaah chuan Pune FC kha nuam ka tih ber leh club anga ka hun tawnah chuan ka ngaihhlut ber ti ila a sual awm lo ve. Tunah hian Pune FC chu tihtawp tum a nih thu te ka lo hria a, pawi ka ti khawp mai. Club neitu leh official-te’n min duhsak em em thin a, naupang taka zawm ka nih avang khan theihtawpin min pui a, professional football ka khelh tan atanga tun dinhmun min hruai thlengtu pawimawh berte zinga mi chu he club hi ka ti lo thei lo. Ka chhuahsan dawn thleng pawhin club thuneitute nen kan inbe tha em em a, “Khawiah pawh kal la, harsatna i neih phawt chuan min rawn biak hreh reng reng suh ang che” tiin tha takin min thlah a ni. Keimah pawh hian Pune khua hrim hrim hi chu ngaihawm ka ti thin. Ka lo awm rei ve hman em avang khan Mizo awmte nen pawh kan inpawh em em a, ka khaw pakhat angah ka ngai hial a, he hmuna ka thil tawn hi ka theihnghilh tawh lo vang.

Club hrang hrang atangin sawmna i dawng nasa thin em?  Transfer agent i nei em?
Pune FC hi a din tan, kum 2007 khan ka zawm a, second division atangin bul kan tan a ni. Pathian zarah ka vannei a, khami kum atanga tun thleng hian club hrang hrang sawmna pawh kum tin mai hian ka dawng chho ve zel a. Mahse, Pune FC chhuahsan nghal mai lova hun eng emaw chen ka lo cham chhunzawm kha tun dinhmun min thlentu pawimawh tak niin ka hria. Hlawh tam zawk nei turin club hrang hrangte’n min rawn bia a, a bikin Kolkata lam hian offer tha tak tak min pe nasa a, an tawngkam a thain mi an sawm thiam bawk si a, rilru a la naupang deuh bawk nen sum tam zawk hmuh theihna tur club chu pan a chakawm thin hle a, Pune FC atanga chhuah pawh ka tum ve thuak thuak hman fo reng a ni. Mahse, senior player, tawnhriat ngah leh thurawn min pe thei tura ka hriatte ka râwn nasa em em a, a tam zawkte thurawn anga Pune FC ka lo chhuahsan nghal mai lo kha thuthlukna dik tak ka siam niin ka hria.

Tunah hian Mizo player tha tak tak an rawn awm chho zel a, chungho ka chah duh chu sum ringawt um hi a fuh ber lo tih hi a ni. Tin, junior player kan nih lai phei chuan tawnhriat nei zawkte leh football chanchin hre tak tak an awm a, chungho thurawn lak chu a hlawk viau mai. Season tawp lam a ni a, player transfer hun a hnai a, club hrang hrang atanga sawmna phone call dawn fo mai chu a nuam ve duh thin khawp mai. Mahse, tunah chuan agent ka nei tawh a, transfer chungchangah hi chuan engmah ka buaipui em em a ngai tawh lo va, ka agent kaltlang hian kan inbe vek tawh mai zel a ni.

India team-ah hian age level bika i lo khelh tawhna lam te?
Age level bikah hian U-19 atangin India team aiawhin ka inlan tan chauh a ni. Kum 2007 khan Iran-ah Asian Football Confederation (AFC) U-19 kan khel a, kha kha ka tel ve hmasak ber chu a ni. Hemi tura kan inbuatsaih lai hian ka kheimit ka tina a, kan kal hma kar khat velah ka tlan tan ve thei chauh a ni. Mahse, kan coach Colintol khan experience neihna atan tiin min hruai ve ta tho va. Colintol hi tun dinhmun ka thlen theihna tura rahbi pawimawh tak min rahtirtu a ni a, ani hi awm lo sela chuan tun dinhmun hi ka thleng thei kher lo vang. Tichuan, a kum lehah AFC U-19-ah ka kal ve leh a, hemi tum hian team captain-ah min dah a. He tournament kan khelh  hnu lawk hian U-19 team bawk chuan South Asian Games, Bangladesh-ah kan zuk khel leh a, hemi tum pawh hian team captain nihna dinhmun min pe leh a ni. He tournament-ah hian ram dang team chu senior player-te’n an khelhpui deuh vek a, India team kha chu U-19 player hlang hlakin kan khel a, Semifinal-ah kan chak zo ta lo a ni.

Tin, kum 2010 khan Asian Games chu Guangzhou, China hmuna neih a nih tumin U-23 aiawhin ka kal ve leh bawk a, hemi tum hian Didika, Sawmfela leh Rozama te ho nen kan khelho a ni. Hemi bakah hian kum 2012 khan AFC U-23, Oman-a neih tumin thlan ka ni ve leh a, hemi tum pawh hian team captain dinhmun pek ka ni leh bawk.


India senior team tana khelh hmasak ber? Ram tana khelh zat?
India senior team tana ka khelh hmasak ber chu kum 2011 khan Malaysia hmunah a ni. Hemi tum hian Chinese Taipei nen kan inkhel a, vanneihthlak takin goal ka thun nghe nghe. He tournament-ah hian match 3 kan khelhah goal 4 lai ka thun ve thei hlauh a ni. Tun thleng hian India senior team tan vawi 26 ka inlan tawh a, goal 9 ka khung tawh bawk.

Mizoram Premier League (MPL) eng nge i ngaihdan? Khelh i châk em?
Mizoram Premier League (MPL) buatsaih a ni hi lawmawm ka ti khawp mai. MPL neih a nih theihna atana a sulsutu pawimawh tak – MFA leh Zonet chhungkuate hi an fakawm ka ti hle a, Football hmangin Mizoram hi bung thar min hruai kai tih chu hmuh hmaih rual a ni lo. Ni e, MPL hi khelh ve pawh a chakawm khawp mai.

Eng club leh ram nge i tan ber?
Club-ah chuan Chelsea ka tan ber a,  ramah chuan Brazil kan tan ber thung.


Tu hnuaia khelh nge nuam i tih ber?
Coach hrang hrang hi ka hrawn ve nual tawh a, India U-19 tana ka khelh laia kan coach, Colintol hnuaia khelh kha nuam ka la ti ber awm e.

Player i khelhpui tawha khelhpui nuam i tih ber?
Colombia mi Stiven Mendoza, tuna  Chennaiyin FC tana ka khelhpui hi player khelhpui nuam ka tih ber chu a ni.

Foreign club-a khelh tumna rilru i nei em?

Foreign club-a la khelh ve hrim hrim hi chu ka tum ruh ve khawp a.

Midangte tan tanpuina i pe nasa thin hlein kan lo hria a?
Mite ang chuan pe nasa lo ve. Pathian zarah mite tanpui theia ka awm hi ka lawm zawk a, midang ka tanpui hian mahni inrintawkna nasa tak ka neih phah thin.

Mizo footballer te chungchanga sawi duh i nei em? Hmasawn zel turin eng nge tih ngai nia i hriat?
Tunlai hian Mizo footballer tha an tam tawh a, tuna MPL khel mek leh khel kher lote pawh Mizoram ringawta awm tumna rilru dah bo a, hmasawn zel turin ka fuih duh a ni. Tin, a bik takin Pu Robert Romawia leh mi inphalte inpekna leh thawhrimna zarah I-League club Mizoram-in kan nei va ta bawk a, a lawmawm hlein ka hria. Nasa lehzuala India rama inpho chhuahna remchang kan nei dawn niin a lang. Mizo player-te hi India ram club tha zawng zawnga kan awm sup sup hlan ka nghakhlel tawh khawp mai. Hmasawn leh zelna tur pawh kan la ngah hlein ka hria, player thenkhat hi chuan tih tak takna leh tum tak takna kan tlachham deuhin ka hria. Puitling taka hrehawm tawrh huam ve te pawh a ngai a ni. Football hi eizawna tlak a ni tih hria ila, hlawhtlinna tawng baw ngei thei turin player te pawh taimakna leh insum-theihna nei turin i inbuatsaih ang u.

Khawvel ram engzat nge i kal tawh? Khawi ram nge nuam i tih ber?

Vanneihthlak takin football avang hian khawvel ram 20 vel lai chu ka kal ve tawh a, Italy nuam ka la ti ber.

Mizo mipuite hnena sawi leh chah duh i nei em?
Mizo mipuite min support a, min tawngtaisak thin tih ka hriatin in chungah lawmthu ka sawi duh a. Tin, kan khelh leh zelna turah pawh Mizo player-te tana min lo tawngtaisak fo turin ka bawk a ni. Mizo society-a vei deuh mai ka nei a, chu chu – nu leh pa, nula leh tlangval, naupang tak taka cancer natna avanga an boral nasa lutuk hi a ni. Cancer tam tak hi chu inven theih niin a hriat a, chuvangin mitin hian hemi kawngah hian tan la ila, ei leh in, zuk leh hmuam-ah te insum ila, kan taksa hriselna i ngai pawimawh tlat ang u tih hi ka sawi duh bawk a ni. Tin, zirna tibuai chuang lova heng – zai emaw, infiamna emaw, eng kawngah pawh kan fate talent neih ang angte hai chhuahsak tura theihtawp chhuah turin nu leh pate ka ngen bawk a ni.

2 thoughts on “Hero ISL hmasa bera Indian goal thun tam ber Jeje Lalpekhlua”

Comments are closed.