India cricket hotupa thi

Board of Control for Cricket in India (BCCI) President Jagmohan Dalmiya chu September ni 17, 2015-a heart attack avanga damdawiina dah luh a nih hnuah, September ni 20, 2015 khan Kolkata, West Bengal-a private hospital pakhatah a boral. Kum 75 mi a ni.

Dalmiya hi India rama cricket a din chhuah theih nana tha leh zung, ngaihtuahna sêng hnem ber te zinga mi a ni a, khawvela cricket board hausa ber a nih theih nana BCCI tana thluak thawhtu ber a ni. India chanchinbu lar The Time of India phei chuan ‘Father of Modern Indian Cricket’ tih hming a vuah nghe nghe.

A thih thu a hriat veleh West Bengal Chief Minister Mamata Banerjee chu hospital-ah kal nghalin zahna chibai a buk a. Twitter-ah tweet nghalin, “Sports thuneitute zinga mi ropui chungchuang, Bengal hmangaihtu diktak a ni,” a ti. BCCI secretary Anurag Thakur pawhin, “India rama sports thuneitute zinga ropui ber a kal ta. Mimal tak pawhin ka tan chân nasa tak a ni a, Indian cricket pawhin a chân a ni. Dalmiya hi kum 15 chuang zel chu ka lo hmelhriat tawh a, kan zavaia min kaihruaitu a ni țhin. Cricket hmangaihtu diktak a ni,” tiin a ziak bawk.

Dalmiya hian BCCI-ah kum 30 chuang zet ring a lo rawlh tawh a. Kum 1990-a Secretary a nih hmain kum 1983 khan treasurer a lo ni tawh a. Hemi hnu hian vawi hnih ngawt secretary atana thlan niin kum 1993-1994 leh kum 1996-1997 khan secretary a ni. Kum 2001-2004 khan BCCI president niin, kumin 2015 March thla ațangin a țum hnihna atan president a ni leh bawk. Hei mai a ni lo, khawvela cricket thuneitu sang ber International Cricket Council (ICC) president hna chu kum 1997-2000 chhung khan a chelh a, Asian zinga ICC president ni thei hmasa ber a ni.