Zahawma : Rising Star of Indian Football

ZORAM TODAY | September 1-14, 2015 – Fela Ngente

Sawi tur ber pawh ka hre lo!” Manchester United-a training thei tura a tling chiah chu a lawm bawk a ni ang, a nghilh dup a ni ber. Ni, eng football club fan pawh ni la, khawvela club lian ber zinga mi Manchester United stadium ‘Old Trafford’-a thut luh ve ringawt pawh inchhuanna tham a tling. Hetah hian kumina kum 15 tling tur Zahawma chuan kar khat chhung training a nei.



A tirah chuan
Subedar Lalpianthara leh Pi Baby Lalrintluangi te fa naupang zawk Vanlalzahawma hi December ni 29, 2000 khan Kolasib Hospital-ah a piang a. Chutih lai chuan Thingdawl Hmarveng-a an thenawm khawvengte chuan kumpinu lalrama football la pêt tur a ni tih an hre lawk bik kher lo vang! 
Delhi lamah
A pa hnathawhna (Assam Regiment) avangin Mizoram an chhuahsan a tul a, kum 2004 February thlaah an chhungkuain West Bengal lamah an insuan lailawk a. Kum thum an awm hnuin Delhi-ah an insawn leh a, tun thleng hian an la awm. Mizoram pawnah panlai hun zawng zawng a hmang a ni ber. Zirna lamah a tluang hle a, tunah hian Army Public School, Shankar Vihar, Delhi-ah pawl XI a zir mek. A harhvangin football a tuichilh bawk a, Class VIII a nih atangin an school football team player a ni tan der tawh. Tunah hian an chhungkuain Gopinath Bazar, Delhi-ah an khawsa mek.

YFI a zawm
Barcelona leh Mohun Bagan tan em emtu hian kum 2014, September thla khan Youth Football International (YFI) Academy zawmin heta luh pawh hi thil awlai tak a ni lo, trial a paltlang zet hnuah a zawm thei chauh a, he hmunah hian striker ropui tak nih tumin a inzir mek a ni.

YFI Academy hi Europe lam mi, Delhi-a hun eng emaw chen lo khawsa tawh Gareth Conde leh Paul Schuttenbelt-te din niin European Football Club dungthulin an academy kalphung an siam a, a bik takin naupangte thinlunga football kalphung dik leh mawi tak tuh ngheh chu an tum ruh hle a, inrintawkna leh thiamna turu tak an neih theih nan international coach 6 leh local coach 12 rualin academy 5-ah zirtirna an pe mup mup reng a; Zahawma te coach ber chu Dutch pachal Paul a ni.

YFI hi Europe Club lian tak takte nen inthlunzawmin an naupangte chu Europe hmun hrang hranga training nei turin hun remchang an siamsak thin a, an academy 5 atangin kumtin naupang tha zual tlemte thlang chhuakin Manchester United, Liverpool FC, West Bromich Albion leh hmun dangahte pawh an thawn chhuak thin.

Europe Kalkawng
Kum 2015 nipui lai a ni a, an tih hin dan pangngaiin YFI Academy lam chuan an naupangte zing atanga Europe lama training tura thawn chhuah tur an melh chho tan ta a. Apollo tyres bultumin an zawmpui club Manchester United chuan Delhi-ah Old Trafford-a kar khat chhung training tur thlanna ni hnih awh event an buatsaih a, hetah hian naupang tha zual 192 lai inlanin kum bithliah hrang hrang-ah an thensawm a. An scholarship programme ‘Go the Distance’ hmanga England kal tura age group hrang hrang atanga a tha ber an thlan chhuah chu  tu dang ni lovin Thingdawl Hmarveng naupang Zahawma ngei chu a ni.

Manchester United lamtluang
Mahni tuina kawng zawha chanchinbu leh TV lama kan lo thlir thin leh suangtuahna ramah chauh kan mitthla thin a taka tawn chu a ropui dan tur sawifiah thiam chi pawh a ni lo. Chu suangtuahna chu Zahawma tan chuan a takin a thleng ta. Kum 2015 July thla tirah ram hrang hrang atanga a tha thlan chhuahte chuan Old Traford-ah ngei training an neiho ta a nih chu.

“Ruihtheihthil an ti ngai lo va, hun an vawng dikin taksa sawizawi an uar hle,” tiin Zahawma hian a training-puite chungchang a sawi. Manchester khawpui hrim hrim chu a thianghlimin a mi chengte an hawihhawm a, hlim hmel an pu reng niin a sawi bawk. A training-naa a thil chhar chhuah pawimawh ber chu infiammite rilru zauzia leh an inthunun thatzia a ni.  

Hmathlir
Zahawma hian a theih anga rei inkhelh a duh thu a sawi a, Mizoram Premier League chungchang kan zawhnaah a hriat chian rih lutuk loh thu leh tlema a len deuh huna khelh ve a châk thu a sawi a, team tan ber pawh a nei hran lo. Indian Super League (ISL) lamah erawh an awmna Delhi club Delhi Dynamos a khelh a châk hle. Tun ang renga a hrisel chuan India ram mai ni lo Europe thlenga khel thei turin hma hun êng tak a nei mek.

Zofate’n hetianga naupang hma hun êng tak kan nei hi a ropui hle a, a rualpuite leh a ai naupang zawkte tan pawh phurna leh chona thar tha tak thlentu a nih ngei a beiseiawm.

4 thoughts on “Zahawma : Rising Star of Indian Football”

Comments are closed.