ZORAM TODAY|Aizawl 5th July, 2020: MNF thalai chuan nimin khan thuchhuah siamin, “Tun hnaia eptu party ṭhalai MPYCC in ram hmasawnna hna thawhna tur work order an hal hi MNF thalai chuan pawi kan ti hle a ni,” an ti.
MNYF chuan Sorkarin work order a siam reng reng hi ram hmasawnna tur vek a ni a, a thawktu chu tu pawh ni se, eng party mi pawh ni se, an hnathawh tur kha ram hmasawnna tur vek a ni, an ti a,”Hemi a nih avangin work order tihchhuah hi eng sorkarah pawh, eng hunah pawh a thleng reng a ni, an ti.
“Zoramin hun harsa leh khirh tak a tawng mek a, hripui leng karah ei leh bara kan intodelhna tur te, ramin hma a sawnna tur tein sorkarin hma a la ve zel a. Hripui leng kara ram hmasawnna hna ṭhanṭhu lova a la kal zel thei hi Finance Dept. fel taka enkawltu Pu Zoramthanga kan chhuang hle a ni,” tiin an tarlang.
MNYF chuan “Mipui vantlang tana thil tha tih tur an hriat ngang loh chuan Inah awm ve mai mai rawhse” tiin Congress Thalaite hi thu an rawn nghal.
Congress ṭhalai hian work order an hum thinte kha ram hmasawnna atana hmang lovin an mimal hmasawnna atan an lo hmang ṭhin zawk em ni tih kan zawt a, hetianga mipui rilru hruai kawi tuma chetna maksak tak mai hi kum zabi 21-naah hi chuan ching tawh lo se kan duh a ni, tiin an thuchhuah ah an tarlang.
MNF Thalai chuan hetiang a nih laiin Congress Ṭhalaiin work order an hal hi, ram hmasawnna dan chah an duh em ni, tih kan zawt a ni, an ti a, “A hlatute hi hmanni maia work order lo hum thlan dupte an ni tih Zoram mipuiin kan hria”, tiin MNF Ṭhalai chuan anmahni mawng an hlim maiah kan ngai, an ti bawk.