November 25 a an hna zawm vek turin FEMSE hriattir

ZORAM TODAY| AIZAWL: November ni 23, 2019 Inrinni chhun dar 12 khan Pu L.Thangmawia, Vice Chairman, Human Resources Development Board chuan a office ah chanchinbu mite a kawm a. Hetah hian Federation of Mizoram Samagra (RMSA & SSA) Employees ( FEMSE)-ten nithum chhung (21, 22 leh 25 November, 2019) chawlh an lak thut  chungchanga sorkar ngaihdan a puang chhuak.

Pu L Thangmawia chuan, ” Zirtirtute’n ni thum chhung a hu hoa chawlh an la thut chuan a barakhaih takzet a ni,” a ti a.

“An chawlh chhan hi  FEMSE atang hian Ministry chuan vawiin ni thlengin official-in engmah a la dawng lo a ni,” a ti bawk.

Human Resources Development Board Vice Chairman chuan, “FEMSE member-te hi Primary School zirtirtu – 550, Middle School zirtirtu – 1643 lai an nih  bakah, High School – 93 leh HSS – 6-ah an thawk mek bawk a.  Tunlai hian sikul hrang hrangah exam neih mek leh neih hmabak a nih avangin zirlaite tan a pawi hle dawn a ni,” tiin zirtirtute chu an nawrh ti tawp turin a beisei a ni.

Pu L. Thangmawi chuan, SSA leh RMSA-te Samagra Shiksha-a chhunfin anih hnu hian thawktute hlawh central lam hian a hma aiin a rawn ti hniam a. Matching share 10% bakah a hmaa an hlawh zat an lak theihnan kum khat zelah Mizoram sawrkar chuan cheng vaibelchhe 27 zet a sen belh mek a ni. Mahse, Finance changtu kan Chief Minister Pu Zoramthanga’n Education a ngaih pawimawh avang leh Education changtu Minister  Pu Lalchhandama Ralte-in theihtawp a chhuah zarah central lamin sum an rawn pek tlai tum pawhin  advance allocation-te siamin Mizoram sawrkar suma hlawh an lo lak theihna turin hma laksak an ni zawk thin a ni.

Tunah hian naupangte exam lai mek leh exam tan leh mai tur an ni a. Hetiang hun khirkhan lai tak remchanga hmanga naupangte hmakhua tihchhiat pawh pawisa lova lungawilohna an lantir hi sorkar tan pawmzam theih a ni lo, L. Thangmawia chuan a ti.

 FEMSE hruaituten nawrh an huaihawt mekah hian sawrkar chuan “NO WORK NO PAY” a kalpui dawn tih sawi nawnin, “Sikul lam thuneitute hnenah pawh zirtirtu kal leh kal lo nitina report tura hriattir an ni,” a ti bawk.

“Samagra Shiksha hnuaia thawktute tuna an dinhmun aia ziaawm deuha siamthat pawh sorkarin a duh a, ngaihtuahna pawh a hmang mek a ni,”

“Amaherawhchu,  sorkar thar kum khat pawh la tling lo hian thiltih a duhte leh dinhmun siamthat a duhte hi chuti rum rumin a tifel nghal vek thei lo a. Anni chungchangah pawh tihthut mai theih loh, hun rei deuh ngai chi a ni a. Sorkar dinhmun hrethiama lungawi lohna an neih mekte an tihtawp hi sorkar chuan a duh a, a beisei bawk a ni,” Pu Thangmawia chuan a ti.

Sawrkar chuan zirlai pawisawilote hmakhua ngaiin FEMSE-ten nawrhna an kalpui mek hi titawp se a duh takzet a; Ni  25th November, 2019 (Thawhtanni) atang hian an hna chhunzawm vek turin zirtirtu zawng zawngte a hriattir a. Sawrkar hriattirna zawm lote chungah a tul ang zelin action a la dawn a ni tih kan inhriattir nghal a ni.

Human Resource Development Board Vice Chairman Pu L Thangmawia hi Samagra Shiksha State Project Director Lalhmachhuana, Addl. SPD leh Jt. Director, School Education Dept. bakah Board member te’n an ṭawiawm.

Sorkar dan zawmlo te chungah engtin nge action an lak dawn, tih zawhna chhangin HRD Board Vice Chairman chuan ,” Sorkarin dan a siam a, dan ang zelin kan kal ang chu,” a ti.

Hetih lai hian FEMSE hian an lo ruahman tawh angin November ni 25 thleng mass casual leave lak an tum chu an ti tlang a, an kal leh zel dan tur rel an tum niin thudawn a ni.