MZP leh MSU in zirtirtu nuar mek te an nawrh ti tawp turin ngen

Vawiin November ni 22 zirtawpni hian MZP General headquarters extended office bearer leh Adviser-te chuan meeting an nei a, MZP  President thar Pu B. Vanlaltana kaihhruai meeting-ah hian tun hnaia Samagra hnuaia thawk Federation of Mizoram Samagra Employees (FEMSE) sorkar hnena an thil phut avanga an nawrh chungchang an rel a ni.

ZORAM TODAY|AIZAWL:  MZP meeting chuan ‘‘FEMSE-te’n Mizoram sorkara an thil phut an hlawh en nawn tur leh an tana reservation hauhsak phut a, a ruala ‘Mass Casual Leave’ an la chu a pawi a ti hle a. Ni hnih(2) chhung zet leave an lak avangin Mizoram chhung hmun hrang hranga zirna in khar a ngaihphah hi ngaihtuahna fim leh zirlaite tawrhna chu hrethiam zawk a, Mass Casual Leave lak hi titawp a Ni 25 November pawh Leave lak chhunzawm tumna pawh thulh turin FEMSE hruaitute leh member zawng zawng MZP chuan a ngen a ni,” an ti.

MZP chuan Mizoram chhunga zirna in hrang hranga zirlaite exam tura an inpuahchah  lai leh thenkhat exam mek an awm lai a zirlaite rilru tibuai thei leh an zirna in a tawrh theihna tur zawnga thil tih awm reng reng hi MZP chuan a rem ti ngai lo va, FEMSE-te nawrhna leh thil phut thenkhat chu hriatthiam pui viau mah se MZP chu zirlai pawl anih anga zirlaite thlavang hauha ding tlat thin a nih angin, Mizo zirlaite tan a ding chhunzawm zel dawn a ni, tiin an thu chhuah ah an tarlang.

Mizo Students Union (MSU) General Headquarters  pawhin nimin November ni 21 khan thuchhuah siamin, “Federations of Mizoram Samagra Employees (FEMSE) te’n an hlawh leh a kaihhnawih chungchanga sorkara thil phut an neih avanga sorkar karna atana ‘Mass Casual Leave’ an la hi pawi kan ti a, zirlaite tawrhna tur ngaihtuah chunga ngaihtuahna fim zawk seng nawn leh turin MSU chuan kan ngen a ni,” an ti a.

MSU chuan, tunhnaiah hian Mizoramah zirlai hrang hrang— Primary, Middle leh High School te’n exam an nei chho dawn mek a, chumi atan chuan zirlaite nasa takin an inbuatsaih mek a ni. Chutianga exam pawimawh tak, an kum khat zirna an hlen ve theihna tur exam hmachhawn tura an inbuatsaih mek laia zirtirtu zawkin Mass Casual Leave an la hian zirlai exam hmachhawn turte nasa takin a tibuai theih dawn niin MSU chuan kan hria a. An harsatna chu eng pawh ni se, he an hmalakna hi zirlaite’n exam an zawh hma chu chhunzawm lova chawlhsan rih turin MSU chuan FEMSE a ngen a ni,” tiin an thuchhuah ah tarlan a lo ni tawh a ni.

MZP leh MSU hian Federation of Mizoram Samagra Employees (FEMSE) te’n an thil phutte Sorkar pawhin a theih anga an harsatna te enfel a, a hma lama chinfel dan kawng zawnsak turin an ngen nghal bawk.

(PIC- MZP File Picture)