MSU in zirtirtu nuar mek FEMSE(SSA/ RMSA) te ngaihtuahna fim zawk seng nawn turin ngen

November 21, 2019 aṭanga ni 25 thleng a huhoa chawlh( Mass casual leave) neia hun hmang mek, SSA/ RMSA zirtirtu inzawmkhawm pawl Federations of Mizoram Samagra Employees(FEMSE) te chu ngaihtuahna fim hmang nawn leh turin MSU in an ngen.

ZORAM TODAY| AIZAWL: Vawiin a thuchhuah an siam ah Mizo Students Union (MSU) General Headquarters chuan, ” Federations of Mizoram Samagra Employees (FEMSE) te’n an hlawh leh a kaihhnawih chungchanga sorkara thil phut an neih avanga sorkar karna atana ‘Mass Casual Leave’ an la hi pawi kan ti a, zirlaite tawrhna tur ngaihtuah chunga ngaihtuahna fim zawk seng nawn leh turin MSU chuan kan ngen a ni,” an ti.

MSU chuan tunhnaiah Mizoramah zirlai hrang hrang— Primary, Middle leh High School te’n exam an nei chho dawn mek a, chumi atan chuan zirlaite nasa takin an inbuatsaih mek a ni. Chutianga exam pawimawh tak, an kum khat zirna an hlen ve theihna tur exam hmachhawn tura an inbuatsaih mek laia zirtirtu zawkin Mass Casual Leave an la hian zirlai exam hmachhawn turte nasa takin a tibuai theih dawn niin MSU chuan kan hria a. An harsatna chu eng pawh ni se, he an hmalakna hi zirlaite’n exam an zawh hma chu chhunzawm lova chawlhsan rih turin MSU chuan FEMSE
a ngen a ni, an ti bawk.

Federation of Mizoram Samagra Employees (FEMSE) te’n an service kaihhnawih chungchanga an thil phut te hi MSU chuan ngun taka kan ngaihtuahin kawng tam takah âwm a tihpui a. Sorkar pawhin a theih anga an harsatna te enfel a, a hma lama chinfel dan kawng zawnsak turin MSU chuan sorkar thuneitute a ngen nghal bawk, tiin MSU thuchhuah ah tarlan a ni.

FEMSE hian tunhnai khan Chanmari YMA hall ah inkhawmpui neiin an hlawh tihsan bakah a ngheta zirtirtute dah luh dan ngaihtuah pui turin resolution an siam a.

Zoram Today thudawnna in a sawi danin FEMSE hian an ‘Ultimatum’ siam hi a ngaihtuahtu tur ber Chief Minister leh Education Minister ah lehkha ziakin an pe lova, Sorkar angin officiala hriatpui a niloh thu an sawi. An lehkha hi Assembly Speaker ah an pe a, a copy Education Secretary Pi Esther Lalruatkimi an pe bawk tih thudawn a ni.

Kan thudawn danin FEMSE  hian an hlawh tihsan an phutna lamah zirtirtu nghet hlawh zat ang leh zirtirtu nghet lak ah 70% chu FEMSE member te tan hauh an phut niin an sawi.