Dr. Thangtea’n Synod Hospital a tlawh; October aṭangin Health Care Scheme ṭha mi

Vawiin September ni 10 khan Health& Family Welfare Minister Dr. R Lalthangliana chuan Kohhran enkawl damdawiin pahnih, Presbyterian Church of India(Mizoram) enkawl Synod Hospital, Durtlang leh Seventhday Adventist Kohhran enkawl Adventist Hospital, Vaivakawn a awm chu a tlawh .

Aizawl, September 10: Minister Dr. Thangtea hi Hospital hotuten lo dawng sawngin inkawmhona hun ṭha damdawiin pahnihah an nei ve ve a. Health Minister chuan thusawiin, “Mizoramah Health Care Scheme thar October ni 1 atangin kalpui a ni dawn a, Kohhran enkawl damdawiin pawhin he scheme thar hi thlawp a, ṭha taka an kalpui theih ka beisei ani,” a ti. Kohhran enkawl Hospital leh Health department in thawhhona ṭha an neih ṭhinah lawmthu sawiin thawhhona tha an neih chhunzawmzel a beisei thu a sawi a sawi bawk.

Minister chuan Damdawiin tihchangtlun kawngah Kohhran lam aṭanga tih remchang silo Sorkar lam aṭanga tih theih ang chi a awm anih chuan theih ang anga ṭan lak a in huam thu a sawi tel bawk.

Dr Thangtea chuan Mizoram Sorkarin Health Care Scheme thar a duang tih sawiin, “He thil hi hlawhtling taka kalpui tur chuan Private damdawiin leh Kohhran damdawiin te nen kan thawh ho ṭhat a pawimawh hle ani,” a ti a.

He Scheme thar hnuaiah hian chhungkua a hotu ber hmingin inziahluh theih a ni dawn a, Chhungkaw khat tan kum 1 ah cheng nuaih  hnih (2 Lakhs) zel inenkawlna senso a hman theih dawn ani. Heath Care scheme hmasa, tuna hman mek hi chuan a huam zaulo a, natna khirh khan deuh bik chauh bill theih a ni a; mi tamtakin an chhawr tangkai pha lutuk lova. He Health care scheme thar kalpui tur hi chuan huam zau deuh zawkin natna tam zawk bill theih tura ruahman a ni ang.

Health Ministerin Kohhran enkawl damdawiin a tlawhnaah hian Dr Thiamsanga Health & Family Welfare Board Vice Chairman leh Prof F. Lalnunmawia Horticulture Board Vice chairman ten an tawiawm ani.