MPC Party ṭhiat a, ZPM a inchhunluh chungchang MPC chuan a la ngaihtuah ngai lo : Lalhmangaiha Sailo, MPC President

ZORAM TODAY: Vawiin July ni 11, 2019 Ningani hian Mizoram Peoples’ Conference Party (MPC) chuan an party office, Durbar Hall ah General Assembly an nei a. Kum 2019 – 2021 atana an hruaitu tur thlang tharin, Party President ah Lalhmangaiha Sailo an thlang nawn. He hunah hian party mi an kal ṭha hle.

Vice President ah Lalthansanga (Chatea), Ex- MLA leh Treasurer atan V. Lalṭhazuala te an thlang tel nghal bawk.

MPC chuan resolution siamin, kan ram kan hnam leh sakhua a lo him zel theih nan theihtawp kan chhuahzel dawn a ni, tiin NLUP leh SEDP hmanga sum sem hian harsatna nasa zawk min thlen niin kan hria a. Chuvangin, Ei leh bar a intodelhna leh kut hnathawktute dinchhuahna ruahmanna ṭha nei turin sorkar kan phut tlat a ni, an ti bawk.

(File Photo)

Lalhmangaiha Sailo, Party President chuan thu sawiin, ” Founder President Brig T Sailo kha hmathlir thui tak nei anih avangin policy hlawmkhawmna ‘ Six Basic Needs’ nei Party kan ni a. Heng kan mamawh hmasa leh a bul hi hlamchhiahin kum 30 chuang lai kan sorkar a kal avangin awmzia kan la nei thei lo a ni,” a ti.

ZPM in Election Commission of India( ECI) a party registration an hmuh mai turah MPC Party ṭhiat a, ZPM anga inchhuhluh an tum leh tumloh chungchang Zoram Today palai zawhna chhangin MPC President chuan, ” ZPM chu thawhhona (alliance) a ni a, chutah chuan kan tel ho a, thuthlungah pawl ṭhiat lovin kan tia, chu chu a la kal zel a, ZPM in registration a neih avanga pawl ṭhiata automatic a inchhunglut tur ang chuan kan in ngai lo,” a ti.

(File Photo)

Lalhmangaiha Sailo chuan, ” MPC party ṭhiata ZPM a inchhunluh chu pawl ang chuan kan la ngaihtuah ngailo hrim hrim a, thil serious tak anih avangin kan la ngaihtuah ang chu,” a ti bawk.