India Sipai rawn luh danah Mizoram sorkarin thil awmdan a la puang chhuak lo; mipui an thlamuan tur ani: PRISM

PRISM Party chuan ningani February ni 21, 2019 khan thuchhuah siamin India sipai Mizorama rawn lutin dan an bawhchhiat thu leh Sipai rawn luh danah Sorkarin thil awmzia ala puan chhuah loh thute, mipuite thlamuan tura Sorkar an beisei thu an sawi.

Aizawl 22nd February, 2019:  PRISM chuan Sipai in Vathuampui leh Zochachhuah mipui an hruai khawm hi diklo taka dan bawhchhia a mipui tihthlabarna ani a. Mizoram sawrkar hi mipui chhan tur in a che chhuak nghal tur ani a. “Tunlai a mipui ti chiai tu sipai te chetvel dan chungchang ah hian sawrkar hian mipui te thudik min hrilh tur ani,” an ti.

PRISM party chuan, “Hetiang a mipui tamtak an chiai leh thlabar lai hian tun thleng in sawrkar in thil awmdan dik ala puangchhuak lo a, PRISM Party chuan thil awmdan diktak puangchhuak a mipui te thlamuan tur in sawrkar kan phut ani,” tiin an thuchhuah ah an tarlang.

Mizoram chhim lamah nasa tak in sipai an che vel a, Vathuampui leh Zochachhuah khuaah phei chuan mipui an hruaikhawm hial niin media ah tarlan ani a. Sipai te hian duhduh a mipui hruaikhawm leh an pawnchhuah te khap tur in thuneihna an neilo , an ti a.

PRISM Party chuan thil thleng hi human rights bawhchhiatna ani a, chuvang chuan PRISM Party chuan mipui dikna chanvo humhalh a, human rights bawhchhiatna a awm tawh loh nana hma la nghal tur in sawrkar kan phut a. Sawrkar a che thuai anih loh chuan national leh international forum hrang hrang ah thlen in hma la tur in kan ngen ang, an ti.