Reiek tlang hi Tourists te hipna hmunpuiah siam kan tum: Tourism Minister

Aizawl/Reiek 20th February, 2019: Nilaini khan Tourism Minister Pu Robert Romawia Royte chuan Reiek Tlang leh a chhehvela Tourism Deptt hmalak mekte leh hmalak zelna tur hmunte a tlawh a. Pu Lalnunmawia Chuaungo IAS,Chief Secretary leh Official dangte’n Minister hi an tawiawm.

Minister chuan Tourism Deptt in Zo khua’ a Zo In a sak mekte, Zipline 2 siam mekte leh Adventure Sports tihna tur siamte chu tlawhin Contractor te chu hna thataka thawk tur leh Zo Khua chu fur ruah tlak hma ngeia sa zo turin a ngen.

Tourism Minister chuan Reiek kham leh a tlang awm dan chu khawvel hmun danga awmte hmuh chak tur chi ani tih sawiin, “Reiek kham ko sang tak atanga fi lawr chhuaka kea kalna siam anih chuan khawvel huap pawha lar leh tlawhtu nghah ‘Kuala Lumpur Tower’ aiin a sang dawn a ni” a ti.

Minister tawiawmtu Pu Lalnunmawia Chuaungo IAS, Chief Secretary pawhin Reiek khua chu mi tam takin an tlawh thin tawh thu sawiin ruahmanna mumal tak siama hmalak a tul thu a sawi.