Citizenship Amendment Bill, 2016 tlangloh vangin CM Zorama’n lawmthu sawi

ZORAM TODAY| Aizawl 13th February, 2019 : Chief Minister Pu Zoramthanga chuan Citizenship (Amendment) Bill 2016 chu Rajya Sabha ṭhutkhawm tihtawp avanga a tlang tak loh chungchangah lawmthu a sawi a.

“Rajya Sabha chu tawp chin awmlo in sine die in house meeting chu khar a ni ta a. Chutah chuan Citizenship (Amendment) Bill 2016 an kalpui palh ang em tia kan venthawn chu kalpui lo in, ti hian Rajya Session chu a tawp ta a. Tun sawrkarna kal mekah chuan he Citizenship (Amendment) Bill hi lak loh in a awm dawn niin a lang ta a, a lawmawm kan ti hle a ni. India hmarchhak state mipuite zavaia hmalakna rah a nih bakah Mizorama kohhran, NGO zawng zawng, Political party hrang hrang, sawrkar leh mipuite lungrual taka kan theihna zawng zawng nena kan tanhona rah a lang a ni,” a ti.

(CM Zorama’n CAB, 2016 pass a duhloh thu Union HM Rajnath Singh a sawipui lai)

“Mizoramah chuan NGO Coordination Committee-te leh Kohhran te hma an lakna chu a fakawm tiin he kan thiltum hlawhtlinna ah pawh hian a bik takin NGO Co-ordination Committee chungah lawmthu kan sawi a ni,” a ti.

Chief Minister chuan political party hrang hrangin kawng chitin renga hma an lak thu sawi bawkin, Sawrkar ang pawha theih ang anga hmalak a nih thu te, Prime Minister hnenah hmaichhanah a lo thlen tawh bakah Union Home Minister pawh  vawi hnih hemi hungchangah hian a lo hmuh tawh thu a sawi a. Chumi bakah chuan Guwahati North East Regional pary meeting avanga hruaitute inhmukhawmin, hma lak ho leh bawk a nih thu Chief Minister chuan a sawi.

(CAB, 2016 pass anihloh nan NGO co-ordination Committee in Republic Day, 2016 an boycott)

Chief Minister chuan chanchin hriat ruala Meghalaya CM Conrad Sangma nen inbe nghalin North East mipui an thawhhona leh hmalakna avanga hlawhthinna hmu tel nia a hriat leh lawmawm a tih zia a rawn hrilh thu a sawi a ni.

Chief Minister chuan “hetah hian tawp mai lovin, nakinah he Bill hi kalpui that leh tumna awm ta se, kan tanrual a kan ven zui zel a ngai a. Tunah chuan NGO, Kohhran, Sawrkar, Mipui, Political Party hrang hrang thawhhona rah kan hmu hi a lawmawm ka tiin hmalatute zawng zawng chungah lawmthu ka sawi,” a ti.