Chief Minister Pu Zoramthanga a thawk nasa ber: MNF Ṭhalai

ZORAM TODAY| Aizawl 13rd February, 2019: Mizo National Youth Front (MNYF) Headquarter, Aizawl chuan vawiin khan thuchhuah siamin India sorkarin Citizenship Amendment Bill 2016 pass a tum chungchang chu tun hnaiah opposition party ṭhenkhatin remchanga lain, party zawng zawng, tlawmngai pawl zawng zawng leh Mizo mipuite kan ṭanrual a ngaih em em laiin party inbeihna atana hmangin, MNF sorkar chu engmah hma la lo angin an puh a, hei hi thubelhchian dawl lo, mipuite rilru hruai sual tumna a ni tih MNF Ṭhalai chuan kan sawi a ni.

India hmarchhak chief minister zingah Mizoram Chief Minister Pu Zoramthanga  hi he bill duh lova a taka pen chhuak nasa ber a ni a, Mizorama party hrang hrang awm zingah Mizo National Front hi party inbeihna tel lova duh lohna lantir nasa ber a ni tih MNF Ṭhalaite chuan kan ngaihdan a ni.

(PM Modi leh CM Zoramthanga te’n CAB, 2016 chungchang an sawi)

MNF Ṭhalai chuan “State danga la awm ngai reng reng lo, cabinet meeting-ah ṭum hnih zet chu he bill duh lohna thu pass a ni tawh nghe nghe bawk” an ti.

MNF-in party anga bill duh lohna a lantirna leh hma a lakna bakah, sorkar anga hma a lakna ṭhenkhat han tarlang ila:

January 10, 2019 khan Council of Minister ṭhukhawm chuan Citizenship Amendment Bill 2016 pass tumna awm chu, a duh loh thu leh a tawp thlenga a dodal tur thu an pass a. Hei hi duhtawk mai lovin, February ni 12, 2019-a Council of Minister ṭhukhawm chuan an pass nawn leh bawk. January ni 23, 2019-a MZP huaihawta he bill duh lohna lantirna kawngzawh neihah kan minister ṭhenkhat chu an tel hial a.

(HM Rajnath Singh leh CM Zorama’n CAB, 2016 chungchang an sawi dun)

January 13, 2019-ah chief minister Pu Zoramthanga’n prime minister Narendra Modi chu kawmin, Citizenship Amendment Bill 2016 hi pass a nih chuan India hmarchhaka chengte tana a pawi turzia te, pass lo tur leh hmarchhakte huam tel lo turtein a ngen a. Chutiang bawkin January 15, 2019-ah Union Home Minister Rajnath Singh a kawm leh bawk.

January 29, 2019-ah Guwahati-a India hmarchhak state-a political party hrang hrang leader-te, Citizenship Amendment Bill 2016 chungchanga inhmuhkhawm an neihah, MNF President Pu Zoramthanga telin, Mizoram political party zingah MNF hi a tel awm chhun a ni a, tuna sorkar beihna remchang atana hmangtu party-te zingah tel an awm lo a ni.

(MNF Ṭhalai Hqrs hruaitute)

Opposition party te hian he bill hi, a lo rik tirh aṭanga tun thlengin sorkar beihna atan an hmang char char a, MNF an beih avanga Citizenship Amendment Bill hi pass loh tur ni se MNF Ṭhalaite chuan kan ti hle. Chutih laiin MNF kaihhruai sorkar he bill hi pass a nih lohna turin theihtawpin hma a la zel a. Chief Minister Pu Zoramthanga hova Council of Minister ṭhukhawmin “a tawp thlengin kan dodal dawn” an tih hi MNF Ṭhalaite chuan lawmawm kan tiin kan chhuang a, kan ringtawk a ni, tiin an thuchhuah ah an tarlang.