Inthlan laiin kan bialah sum a leng nasa, nuai 100, a hnu lawkah nuai 100! – K.Sapdanga

Vanglaini chanchinbu Editor leh Zonet Cable TV neitu ZPM leader K.Sapdanga chuan MLA Inthlan lai khan a bial chhungah sum a len nasat thu nimin khan ICFAI University ah a sawi.


ZORAM TODAY|Aizawl 1st Feb.,2019:  Nimin January ni 31 khan ICFAI University a Political Science Department leh Zonet Cable TV ṭangkawp chuan Mizorama political party tinte telna Mizoram MLA Inthlanpui 2018 thlirletna leh Lok Sabha Inthlanpui, 2019 thlirlawkna an buatsaih a, political party aiawh te’n thusawina neiin zirlaite zawhna chhanna hun an hmang bawk.
He huna ZPM aiawha thusawitu K.Sapdanga chuan ZPM chu movement anga kal tawh lova political party a kal turin Election Commission of India ah registration ti turin hmalak mek anih thu a sawi.
K. Sapdanga chuan MLA inthlan lai khan a bialah sum a len nasat thu sawiin, ” Cheng nuai 100 an rawn sawi a, a hnu lawk ah cheng nuai 100 dang an rawn sawi leh zel a..” tiin hemi avanga MLA a tlingzo ta lovah a in ngai tih mipui lam aṭang chuan a hriattheih a, inthlan laia cheng nuai 100 sawitu chu eng party nge an nih a sawi langlo thung a, engzat nge amahin sum a sen tih pawh a sawi lang lo.
K. Sapdanga hian Ctizenship Amendment Bill, 2016 chungchangah MNF party sawiselin NDA leh NEDA aṭanga inhnuk dawk duh lovah a puh a, hetih lai hian MNF party aiawha thusawitu leh zawhna chhangtu MNF pary leader H. Rammawi, Ex- Minister  chuan NDA/NEDA aṭanga MNF inhnuhdawh avanga CAB, 2016 hi pass loh tur anih chuan MNF hian minute khat pawh a ingaihtuah loh tur thu sawiin he bill pass anihloh nana MNF kaihhruai Council of Minister thutlukna te, CM Zoramthanga’n Prime Minister Narendra Modi leh Home Minister Rajnath Singh hnena CAB,2016 an dodal thu leh pass an duhloh dan an sawi tawh thu leh MNF hmalakna hrang hrang a sawi lang tel bawk.

H. Rammawi chuan, ” CAB, 2016 chungchangah Mizo mipuite inlungrualna tichhe thei zawngin mi ṭhenkhatte’n thu an sawi ṭhin a, Mizote kan ṭanrual hun laia hetiang zawnga party inchirthehna lam sawitu political party leader an awm ani,” a ti a, lungrual hunah rual ṭhap tura Zoram mipuite a beisei thu a sawi bawk.