Thisen man lak tihtawp vangin MNF Ṭhalaiin lawmthu sawi. Mahni thutiama ding hruaitu kan nei – MNF Ṭhalai

ZORAM TODAY| Aizawl 13rd Jan 2019: Mizo National Youth Front (MNYF) Headquarters, Aizawl chuan January ni 10, 2019-a Council of Minister ṭhukhawmin damlo thisen pek man lak ṭhin tihtawp tura a rel chu lawmawm kan ti takzet, an ti a. Hemi tura hma latu Chief Minister Pu Zoramthanga, Finance Minister ni bawk leh Dr. R. Lalthangliana, Health & Family Welfare Minister te bakah Council of Minister-te chungah lawmthu kan sawi a ni, an ti bawk.

(MNYF Hqrs hruaitute)

MNF Ṭhalai chuan NACO aṭanga thisen sawngbawlna pek ṭhin tihtawp a nih hnu khan kum 2015 aṭangin damlo thisen man chu sorkarin a la ṭan a. Tlawmngaia a thlawna thisen pekte man neia pek chhuah leh ṭhin hi, Mizo mipuite, a bikin khawsak harsa zawkte tan phurrit a tlin avangin MNF party chuan a duh lo em em a, party hruaitute chuan sorkarna a chan chuan thisen man lak tihtawp a nih tur thu an lo tlangaupui ṭhin a ni. Hetianga ministry form a nih aṭanga thla khat pawh la tling lovah campaign auhla tihhlawhtlin nghal a ni hi mahni thutiama ding party hruaitu kan neih vang niin MNF Ṭhalai chuan kan hria a, mipuite hmangaihtu leh an tan pawha innghahna tlak sorkar a nihzia a lang chiang hleah kan ngai, an ti.

(Council of Minister meeting)

Health Minister Dr. R. Lalthangliana ngenna angin MNF Ṭhalai chuan January ni 17, 2019 (Ningani)-ah khian MNYF Pisaah thisen pek runpui a nei dawn a, he hunah hian a duh apiangte thisen pe turin MNF Ṭhalai chuan kan sawm che u a ni, tiin Inrinni khan thuchhuah an siam.