Mizo ṭhalaite thinlungah Mizo Nationalism a alh chho mek : Lalchamliana, Home Minister

Zoram Today: January ni 4, 2019 khan Home Minister Lalchamliana chuan a bial Hrangturzo chhunga Tuichangral Zirlai Pawl General Assembly vawi 9 na, Lungkawlh a neih chu khuallian niin a hman pui.

Home Minister chuan, Ziralaite chu All India/ Central Services leh State Service a tling thei tura an zirna kawngah tum mumal neia lehkha zir turin a chah ani.

Pu Chama chuan ” Tunlaiin Mizo ṭhlalaite zingah Mizo Nationalism nasa taka lo alh chho mek hi thil lawmawm tak ani. Kan zirna leh thiamna a san chhoh ang zela ram leh hnam hmangaihna rilru kan put tial tial a pawimawh hle a ni, a tibawk.

Home Minister chuan ” Sawrkar hnathawh ringawt ni lo, Private sector lama ei zawnna uar deuh deuh turte, State  pawn mai nilo, rampawn thleng pawha ei zawnna kawngah hma kan sawn a ṭul a. Chutihrualin, hetiang lam hawi zawng ei zawnna te hi fimkhur taka kan thlan thiam a pawimawh hle”, a ti .

Hrangturzo bialtu MLA chuan Zirlaite chu bial hmasawnna tura theihtawp chhuah pui ah a sawm a. Khua leh tui ṭha ni thei tura ruihlo laka insum turin a fuih bawk.

He hun hi Timothy Lalrawngbawla Finance Secretary chuan a kaihruai a. General Assembly ah hian 2019 – 2021 chhung a Tuichangral Zirlai Pawl hruaitu thar an thlang nghal bawk. Pu Lalchamliana Home Minister chuan Tuichangral Zirlai Pawl Assembly hmanpui pahin Tuichang lei dawh hna kal mek en puiin, hna chak taka kalpui a nih theih nan leh rintlak taka hnathawk turin hnathawk tute a chah nghal bawk.

Pu Lalchamliana hi DIG, Northern Range; Director, DM&R; SE leh EE PWD Eastern Circle; Serchhip Division; Addl. DC Serchhip leh MNF Party hruaitu ṭhenkhat te’n an ṭawiawm ani.