Football leh Boxing Centre of Excellence kan din dawn : Sports Minister

ZORAM TODAY: January ni 5 hian Sports Minister Pu Robert Romawia Royte chuan Muallungthu khuaa Football leh Hokey Ground NEC suma siam mek chu tlawhin, tihhmasawn dan tur a enfiah a. Helai hmuna Hostel building sak pawh a en nghal bawk.
       
Thusawiin Pu Roberta chuan, “Ministry of Tribal Affairs Govt of India, Mizoram Social Welfare Deptt leh Sports & Youth Services Deptt ṭang kawpin Mizoramah Football Centre of Exellence leh Boxing Centre of Exellence din kan tuma, a bika enkawl tlak naupang Talent nei ṭha bikte Coach ṭhate’n Centre Hostels-ah an enkawl thei dawn ani,” a ti.

     
Sports Minister chuan kum liam ta daiha Youth Olympic a Weightlifting Gold Medallist Jeremy Lalrinnunga leh Youth Olympic Games leh Asian Games Hokey-a India aiawha Silver Medal ve ve dawngtu Lalremsiami te Lawmpuina sum Mizoram Sorkarin a lo pe lo reng chu pawi a tih thu sawiin, ” A rang thei ang berin Youth Olympic Weightlifting Champion Jeremy-a chu Rs 15 lakhs leh Lalremsiami Youth Olympics a Hockey-a Silver Medallist nih lawmpuina Rs 10 lakh leh Asian Games a Silver Medallist nih lawmpuina Rs 10 lakh (avaiin Remsiami tan Rs 20 lakh) pek thuai an ni dawn,” a ti bawk.

     
RRR chuan CM nachâng hre tak Pu Zoramthanga kaihhruaina hnuaiah Sports Policy ṭhatak duan a ni dawn a, Sports Tourism lamah pawh hmasawnna lian tham a thleng ngei dawn a ni a ti.
     
Amah ṭawiawmtu Pu Lalrinsanga Ralte,  Serlui Bial MLA pawhin thu sawiin, Sports Minister tumruh leh tawn hriat ngah tak Pu Roberta enkawlna hnuaiah Mizo ṭhalaiten nasa taka hmasawnna thar hmuh an beisei tih sawiin, Sorkar ṭawiawm turin kalkhawmte a ngên a ni.
     
Minister hi Pu Rinsanga MLA bakah Pu C.Laltlanthanga Sports Council Secy leh Party mite leh Officials ten an ṭawiawm a ni.