Health Minister Dr. Thangtea’n Referral Hospital tlawh

ZORAM TODAY| Aizawl 27th December, 2018 :Health & Family Welfare minister Dr. R. Lalthangliana chuan vawiin chawhma khan Falkawna State Referral Hospital a tlawh.

Health Minister hian State Referral Hospital a ward hrang hrang a tlawh chhuah vek bakah Laboratory leh ICU chi hrang hrangte a tlawh a, an hnathawh dan leh mamawh an neih te, harsatna an tawh te chipchiar takin a ngaithla a ni.
 State Referral Hospital a thawkte hma ah thu sawiin Health Minister chuan an party in sawrkarna an siam hmasak laia Referral Hospital tur bul an tan tirh a an ngaihtuahna awm pha ngailo thil thar tam tak khawvel thiamna leh technology hmasawnna in a ken a awm tawh tih a sawi a, ” Thil tha leh tangkai tam tak tihbelh tur a awm a, ICU a Oxygen khawl siamthat ngai pawh a rang thei ang bera siamthat nghal ani ang, tin khawvel changkang chho zelah thil thar tam tak a awm reng a, Hospital a thawkte pawh hmasawn zel tura thiamna an neih belh zel a pawimawh dawn a ni,” a ti bawk.

Dr. Thangtea chuan, “Mizorama damdawiin lian ber kan neih hi Sawrkarin a ngaihthah dawn lova, a tihchangtlun kawngah leh chhawmdawl kawngah theihtawp a chhuah dawn a ni,” a ti a, Hospital a damlote pualin Krismas leh Kumthar chibai bukna atan Rs. 10,000/- a hlan bawk.


Health Minister Dr. R Lalthangliana hi Social Welfare Minister Dr. K Beichhua, Aizawl South III bialtu MLA Prof. Lalnunmawia bakah H& FW Dept. Director Dr. T Lalhmangaihi leh thawktu dangte’n an ṭawiawm ani.