CM Zorama’n Khamrang kawng NH 54 a tlawh

Kawngchhe zuallai te arang thei ang bera thawmthat leh Ruihhlo ngai enkawlna Seṭhawnah rang taka din tum a nih thu Chief Minister Pu Zoramthanga chuan a sawi.

ZORAM TODAY| Aizawl 27th Dec.,2018: Tukin khan Chief Minister Pu Zoramthanga chuan Khamrang dunga National Highway 54 siamthat dan tur PWD hotute nen a hmunah an enfiah. Chief Minister hi Information & Public Relations Minister Pu Lalruatkima’n a tawiawm. Chief Minister chuan kawng siamthat hna chu a rang thei ang bera thawh a duh thu a sawi a.

Fur ruahtui tlak hma ngeiin kawngchhe zualpui siam zawh hman tum a nih thu a sawi a. Kawng siam dan tur PWD hotute nen sawihovin, a ṭhen lai chu cement concrete a siam a nih tur thu sawi a ni.Chief Minister hian Seṭhawn-a ruihhlo ngaite enkawlna hmun a tlawh nghal a. He hmunah hian ruihhlo leh zu avanga buaite a rang thei ang bera enkawl an nih theihna turin chak taka hmalak a nih tur thu a sawi a. Hemi atan hian hna ṭan nghal vat theih dan tur ngaihtuah a nih tur thu a sawi bawk.

CM leh a hote hian Horticulture Department farm, Thingdawl ami chu chipchiar takin an tlawh bawk.Chief Minister hi Principal Secretary to CM leh PWD Secretary ni bawk Pu Lalram Thanga, PWD (Highway) Chief Engineer Pu K. Sawmvela leh officer dangten an tawiawm a ni.

Source : Zira, DDK