Lalchhungkaw rorelna duhloh avang leh eirukna avangin Congress Party a kehchhe mek – MNYF Vice President

ZORAM TODAY : Inrinni November ni 10, 2018 khan MNYF Hrqrs., chuan ITI Veng, Aizawl-ah street campaign a nei a, Pu Vanlalringa, Mizoram People Forum (MPF), ITI Local kaihhruaina hnuaiah Aizawl South-II MNF Official Candidate Denghmingthanga leh MNF Ṭhalai Vice President Lalremruata Chhangte te’n thu an sawi.

(Upa Denghmingthanga, MNF Official Candidate, Aizawl South II)

Aizawl South II MNF Official Candidate Denghmingthanga chuan Pathian leh Aizawl South II bial mipuite duhsakna dawngin he bial enkawl tura an thlantlin ngei a beisei thu sawiin, “Bial chhungah Congress sawrkar hmasawnna hnathawh a chawl ṭhup hi pawi ka ti a, thlan tlin ka nih chuan theihtawpa he bial leh ram tan rawngbawl ka tum ani,” a ti.

Denghmingthanga chuan, “MNF-in sawrkarna kan chan chuan sawrkarin zu a zawrh chu kan titawp dawn a, Pathian duhdan ang zela ro kan rel chuan ram hmasawnna tluantling kan nei dawn a ni,” a ti a, Politics a nih vanga dawt thu hmanga vote zawn a ṭhat loh thu sawiin, “Helai bialah Party dangte’n an thuchhuah leh Synod Social Front thuchhuah chu phek khatah dah khawmin mipui chhiar theih turin an sem darh chiam mai a, thil dik lo leh tenawm tak an ti a, ngaihdam dilna an siam ta hi thil lawmawm a ni a, mipui vote zawn nana hetiang thil dik lo tih hi ching chhunzawm tawh lo turin ka ngen takzet a ni,” a ti bawk.

(Lalremruata Chhangte, MNYF Vice President)

Thusawitu dang MNF Ṭhalai Vice President Lalremruata Chhangte chuan, “Lalchhungkaw rorelna avang te, eirukna leh induhsakna hleihluak avang tein Congress Party chu chhungrilah a kehchhe mek a, sorkarna siam leh turin an mi leh sate pawh an inring zo tawh lo va; hruaitu lawk aṭanga a te ber thlengin Congress chhuahsan hri rampumah a leng mek a, MNF-ah an lut zel a ni,” a ti.

Lalremruata Chhangte chuan Party hruaitu lu pahnih Lal Thanhawla leh Lalduhoma te’n BJP a taka an thawhpui hnu leh thawhpui mek laiin la thawhpui ve miah lo MNF te BJP nen thawkdun anga an sawi ṭhin chu Zoram mipui zah lohnaah an ngai tih sawiin, “Kum 2014 Lok-Sabha leh Hrangturzo Bial bye election te, 2015 AMC inthlan leh Aizawl North III MLA bye election-ah Lalduhoma’n BJP a thawhpui thu hi Zoram mipuite hian an hria a ni,” a ti a. “Chakma Autonomous District Council (CADC) inthlanah BJP leh Congress Party-in sawrkar inṭawm an siam mek a, Lal Thanhawla’n October 26 khan CADC-a BJP leh Congress inzawmna kan chhu chat ti mah se vawiin thlengin BJP leh Congress chuan sawrkar inṭawm an la siam reng a, lang leh mai tura dawt sawi ṭhin hi sim tawh turin MPCC President hi MNF Ṭhalaite chuan kan phut a ni,” a ti a, mipuite chu thudik finfiahna zawng ṭhin turin a ngen a ni.