Congress Party chhungkua a buai zual zel ; Congress leh Assembly Speaker aṭangin Hiphei a bang dawn ta

ZORAM TODAY : Tunhnai hian rorel lai Congress Party chuan a khat tawkin an hruaitu pawimawh an chan chho zel a, MPCC Vice President R. Lalzirliana bakah an General Secretary Lalrinliana Sailo te’n Congress Party chhuahsana MNF an zawm hnuah Assembly Speaker leh Rajya Sabha MP hlui Hiphei chuan naktuk November ni 5, thawhṭan hian Congress Party leh Assembly Speaker aṭanga banna thehluh a tum niin Zoram Today chuan thu a dawng.

Palak bial aṭang thlan tlin Hiphei hi kumin 2018 MLA inthlan ah Congress ticket in a ding dawnlo tih a chiang tawh a, Palak biala candidate in chuh hian IAS officer chawltawh K.Riachho nen an buk tawn zak zak a, boruak ṭhalo a thleng dawn nia ngaiin veteran KT. Rokhaw chu INC official candidate tura dah ani zawk dawn ta ani.

Thu rinawm tak Zoram Today in a dawn danin Hiphei hian naktuk November ni 5 hian Assembly Speaker aṭanga a banna Dy.Speaker hnenah a thehlut ang a, MPCC President Lal Thanhawla hnenah Congress Party aṭanga banna a thehlut thung dawn ani.

Hiphei hian BJP a zawm nghal ang a, BJP ticket in Palak bialah a ding chhunzawm dawn niin kan thu dawnna chuan a sawi.

Tunhnaia Delhi leh Guwahati a Hiphei kal khan Assam Minister leh MLA inthlana Mizoram vil tura BJP in a ruat Himanta Biswa Sarma bakah BJP hotu sang an President Amit Shah bakah Union Home Minister Rajnath Singh te nen pawh Delhi ah an inkawm nia hriat ani. Siaha district a BJP campaign pui tur hian central BJP hotu lu te Mizoram an rawn thleng dawn hnai nia hriat ani bawk.

Kum 81 na hmang mek, ‘Father of Mara’ an tih hial Hiphei hi MLA ah ṭum 7 thlan tlin alo ni tawh a; kum 1972 leh 1978 ah Tuipang bialah Independent in thlan tlin ani a, 1979 ah Janata Party in Tuipang bialah tho thlan tlin ni lehin 1984, 1987 leh 1989 MLA inthlan ah INC ticket in a bial ngai Tuipang ah bawk MLA ani leh.

Kum 1990 – 1996 leh 1996 – 2002 chhung khan Indian National Congress aiawhin Rajya Sabha ah Member of Parliament ah thlan tlin ani a, hemi hnu kum 2013 MLA Inthlan ah INC ticket in Palak (Tuipang) bialah MLA atan thlan leh ani bawk.