INC ticket in Assembly Speaker Hiphei abial ah ding nawn dawn ta lo; BJP a zawm dawn?

ZORAM TODAY: Indian National Congress aṭanga Palak constituency a thlan tlin Assembly Speaker Hiphei chu a bial ngaiah INC ticket in a ding nawn dawn lo niin a lang chiang ta a, hetih lai hian BJP a zawm dawn niin sawi a awm zui nghal.

Vawiin November ni 2 hian Mara Autonomous District Council( MADC) Legislatures Party chuan meeting an nei a, resolution siamin kum 2018 MLA election lo awm turah Congress ticket atan Siaha bialah S.Hiato leh Palak bialah KT.Rokhaw MPCC in min lo dahsak hi keini MADC Legislature Party meeting chuan lawm tak leh lungrual takin kan pawm, an ti.

MADC Legislature Party meeting chuan, ” An pahnih a an tlin ve ve ngei theih nan theihtawp kan chhuahpui dawn ani,” an ti bawk.

Delhi a cham mek Palak bialtu MLA leh Aassembly Speaker Hiphei hi biak pawh theih ani lova, naktuk Inrinni hian Delhi aṭang Aizawl a lo thlawk haw dawn nia hriat ani. Thu rinawm tak kan dawn danin Hiphei hi Delhi ah BJP hruaitute nen an meeting niin sawi a awm a, sawrkar hotu pawimawhte pawh a hmu tho nia hriat ani bawk.

MADC a Congress MDC ṭhenkhat sawi danin Hiphei hian BJP a zawm tur thu an sawi a, a bial ngai Palak ah BJP ticket in Hiphei hi a ding dawn niin an sawi bawk.

MADC chhungkua-a INC MLA candidate inchuhna boruak avang hian MNF candidate te pahnih M.Chakhu (Palak) leh Dr.K Beichhua( Siaha) te chuan MLA  tlinna hun ṭha an nei chho hle ah Politics zir mite chuan an ngai.