CM Lal Thanhawla khing turin Serchhip tlangval dang Kapliana Pachuau

National Peoples’ Party (NPP) chuan Serchhip biala Chief Minister Lal Thanhawla khing turin Serchhip Times Editor leh ZPM General Secretary hlui Kapliana Pachuau an ruat.

Zoram Today: Nimin 30th Oct 2018 khan Kapliana Pachuau chuan Jemela Restaurant ah  National People’s Party(NPP) te’n NPP official candidate a Serchhip biala ding tura an sawmna a pawmthu tualchhung chanchinbumite hmaah a puang.

Kapliana Pachuau chuan “National People’s Party (NPP) hian lamkal rawn tirin Serchhip Constituency a Official candidate atan kei tehlul hi min rawn sawm ve ṭhin a, mimal taka ka fellohna te, chhungkaw dinhmun atang pawha MLA inthlan chuh tlak lo ka nihzia te hrereng chungin inthlahrung takin ka lo hnar ṭhin a, amaherawhchu an beidawng duh mai lova, chumi hnu ah Oct. ni 27, 2018 inrinni tlai dar 5:00pm khan Hotel Floria, Dawrpui, Aizawl ah hmaichhan ngeiah kan inbia a, an Party nihphung te, Mizo mipuite tana hmalak an tumdan te ngun taka ka ngaihthlak hnu ah an mi sawmna chu lawm takin ka pawm ta a ni” a ti.

NPP unit hi Serchhip ah din a la ni lova, Thenzawl leh Buangpui ah erawh din a ni tawh tih sawiin ZPM General  Secretary hlui chuan “NPP hian Unit mumal la nei lo mahila Serchhip mipui ten min vote phawt chuan ka tling thei a ni” a ti.  Mizoram inthlanpui zawh hnu ah nakum MP inthlan tur atan kan inpuahchah chho zui nghal dawn a, chumi hnu kum 2023 Mizoram MLA Inthlan lo awm tur atan kan insangmar chho zui lehnghal dawn a ni, a ti bawk.

(Kapliana Pachuau, Dr. Lalrina  Jahau (Mizoram NPP hotupa) leh James Sangma ( Meghalaya Home Minister leh NPP hruaitu)

Kapliana Pachuau chuan MLA election result puan ruala Serchhip chhuahsana Aizawl awm zui leh vek turte Serchhip ah an ding dawn nia sawiin, ” Kei chuan Serchhip bial hi pemsan ka tum lova, ka thutchilh dawn a ni,” a ti bawk.

Lok Sabha Speaker hlui  PA Sangma chuan kum 2013 khan National Peoples hi a din a, Party naupangte niin tunah hian a ṭhangchak hle a, NPP hian Meghalaya ah sorkarna siamin NPP President Conrad Sangma chu Chief Minister a ni. Hei bakah hian Manipur ah BJP nen sorkarna siamin Deputy CM leh Cabinet Minister 3 an chang a, Nagaland ah MLA 2 neiin Arunachal ah MLA 7 an nei tawh bawk a ni.

Zoram Today zawhna chhangin Serchhip biala ding tur Kapliana Pachuau chuan, ” NPP anga kan ding tur hi ZPM in a tuar ber dawn niin ka hria”  , a ti a, CM Lal Thanhawla bei ngam tura ding anih thu a sawi bawk.