Congress aṭangin banna ka thehlut lo, dawt thu thehdarh ani : Hiphei, Assembly Speaker

Zoram Today: October ni 30, thawhlehni zan dar 8:30 vel khan whatsapp ah  Assembly Speaker Hiphei chanchin  thehdarh ani a, chutah chuan vawiin tlai dar 3 khan Congress aṭanga banna Hiphei hian Chief Minister Lal Thanhawla hnenah a thehlut a, BJP a zawm dawn, Guwahati ah BJP hruaitute hmu turin a kal mek, tih ani, whatsapp group hrang hrangah titi zui a hlawh nghal. Hemi hi hriat anih veleh zanin hian Zoram Today palai chuan Guwahati a cham mek Hiphei hi a be pawp nghal.

Hiphei chuan whatsapp vela a chungchang thu thehdarh chu dawt anih thu sawiin, ” Congress aṭangin ka bang re re lo, tu lo thehdarh nge ni aw, dawt thu mai mai ani e,” tiin Zoram Today a hrilh.

Guwahati ah a kal ngei nia sawiin ,” Guwahati ah chuan ka awm a, mahni hna pawimawh tia kal ka ni” tiin a sawi bawk.

Zawhna zawh tam hman ani lova, Congress party a chhuahsan dawn leh dawn loh pawh a sawi lo. Tunhnaia Congress Party in Palak biala Congress MLA official candidate a puan hnuah K.Riachho-a ṭan tu pawl ṭhanhem tak nen an inkar nasa takin a khi niin sawi a awm a, tunah hian Mara Autonomous District Council (MADC) bakah Siaha District Congress Committee chhungah pawh Palak MLA candidate chungchangah buaina a in mung mek nia sawi a awm bawk.