ZPM MLA neih chhunin MNF an sawrkar a ring. ” MLA candidate tur hi chuan khawiah mah kawng a kaw tawhlo” – Lalthanliana

Political Party leh pawl hrang hrang inzawmkhawm Zoram Peoples’ Movement (ZPM) MLA neih chhun, Aizawl North II bialtu Lalthanliana (MPC) chuan tun dinhmunah a tan MLA nihna kawng a tawp tih a sawi a. 2018 MLA election ah MNF party in sawrkarna an siam a ring tih Zoram Today a hrilh.

ZORAM TODAY: Zanin khan kan palai zawhna chhangin Aizawl North II bialtu MLA Lalthanliana chuan an pawl (ZPM) aṭanga MLA candidate a chan nawn tawhloh tur thusawiin, ” Tunah hian ka dinhmun chu he ti hi ani ta mai a, candidate ka chang dawn lo a, candidate tur ang hi chuan khawiah mah kawng a kaw tawhlo ani,” a ti a. ” Ka lo tling lovin hotute mit ka tlung lo ani ang e, ka ti mai a, a chhan leh vang hi keichuan ka hrethiam chiah lova, thu leh hla rawn kal hian min rawn deng dawt ani mai, ” a ti bawk.

Sawi chhunzawm zelin , ” Politics khel turin rilru leh ngaihtuahna zawng zawng ka lo pe ve a, han bansan hi ka la tum rihlo ani, ” a ti a.

MNF party in an party a lut tura an sawm leh sawmloh chungchang zawhna chhangin Lalthanliana chuan,” Sawi hona te chu kan nei ve a, thutlukna ka la siam lo, ka kalzel dan tur hi sawi har ka la ti a, kan party (MPC) hruaitute leh ṭhian ṭhate nen sawi khawmte kan tum ,” tiin, Aizawl North II bialtu MLA chuan mahni chauha tal chi anih tawhloh thu leh fimkhur a ṭul thu a sawi lang bawk.

Zawhna chhangin Lalthanliana chuan, ” Ngun taka thil kaldan leh kalphung ka thlir hian tun inthlanpui lo awm turah MNF party hian sawrkarna an siam ka ring khawp mai,” a ti bawk.