Rinliana Sailo chungah MPCC Disciplinary Action Committee in ngaihtuahna la seng lo

Tun hnai khan MPCC General Secretary Lalrinliana Sailo, MLA chuan an party tana thu lawmawm lemloh ni a ngaih theih vawi hnihthum lai a sawi hnuah Mizoram Pradesh Congress Committee(MPCC) a Disciplinary Action Committee chuan Lalrinliana Sailo hrem leh hremloh chungchang thuah engmah ngaihtuahna an la senloh thu an sawi.

ZORAM TODAY:    Vawiin Pathianni a Zoram Today palai zawhna chhangin MPCC DAC Chairman C.Lalpianthanga chuan, ” In sawifiah turin kan la ti lo , ngaihtuahna kan la senglo hrim hrim a, ṭhutkhawm pawh kan la nei lo, tunah phei chuan thingtlang lamah ka awm daih,” tiin a sawi.

 Kar liamta zirtawpni September ni 21, 2018 khan Congress Sawrkara Cabinet Minister hlui leh Tuichang bialtu MLA nimek Lalrinliana Sailo chuan Congress MLA candidate tan Tuichang bialah tlin a har dawn tawh thu a sawi a.

 Thuthar thehdarhtu thenkhatte’n amah an kawmna ah Tuichang bialtu MLA chuan, ” Pu Tawna (MNF Sr.Vice President) hi vote 3000/4000 velin a chak tawh mai lo maw aw ka ti,” tiin an Party tan bial hautak anih tur thu a sawi. Rina Sailo chuan ” Khawzawl mipuite’n district tihpuitlin an duhna a nasa a, tin kan sawrkarin zu kan zawrh avangin kan tla hniam bawih bawih a, kan party tan chak a harsa tawh dawn ani,” a ti a. Sawrkarin zu an zawrh chu kohhran ah an tlaknatloh pha thusawiin pawi a tih thu a sawi bawk.

 Congress Party General Secretary leh Aizawl District Congress Committee a President pawh lo nitawh Lalrinliana Sailo hian September ni 19 khan chanchinbumi ṭhenkhatte hmaah Congress in an Vice President R.Lalzirliana an hnawtchhuak chu pawi a tih thu leh Home Ministerin a bial mipuite aiawha district function a ngiat chu awm a tihpui thute, Congress sawrkar tan thil tih hlawhtlin harsa anihloh thu a lo sawi tawh ani.

(Pic: MNF Sr.Vice President Tawnluia leh Lalrinliana Sailo)

Hetih mek lai hian Congress party member ṭhenkhatte chuan an MLA Lalrinliana Sailo hi an ngaina tawhlo tih hriatthiam theih turin tunlai hian social media ah tunhma lama MNF in an beihna thu ṭhenkhatte an thehdarh nawn sak ve leh thung.